Маленькие звёздочки в большом созвездии (+фото)

Не паспелі адгучаць фанфары любімага многімі гараджанамі фестывалю эстраднай песні “Пастаўскія зоркі” і астыць эмоцыі яго ўдзельнікаў і гледачоў, як раённы Дом культуры запрасіў усіх на аналагічны дзіцячы фестываль “Пастаўская зорачка”. Ён запаліў агні 21 красавіка і стаў не менш сонечным і яркім, чым надвор’е за акном.

У адрозненне ад старэйшага сабрата, якому ўжо больш за два дзесяцігоддзі, “зорачка” з’явілася на эстрадны свет усяго тры гады назад. Але, нягледзячы на зусім юны ўзрост, паспела заваяваць вялікую армію прыхільнікаў і сёння не саступае “даросламу” святу песні ні ў майстэрстве маленькіх выканаўцаў, ні ў колькасці жадаючых выйсці на раённую сцэну, каб прадэманстраваць свой вакальны і артыстычны талент. На жаль, некаторым артыстам зрабіць гэта перашкодзіла зменлівае вясенняе цяпло. Прыгрэўшыся пад красавіцкім сонейкам, дзеці неабачліва распрануліся, у выніку падхапілі ангіну і іншыя прастудныя захворванні. І хоць канкурсантаў прыехала на фестываль менш, чым меркавалася, — толькі 21 чалавек, — гэта зусім не сапсавала агульнае ўражанне ад свята, а журы (у яго склад увайшлі дырэктар РДК А. Б. Чарнюк, музычны кіраўнік АДРАЦ “Ветразь” Н. Л. Селіванава, выкладчык Пастаўскай дзіцячай школы мастацтваў імя А. Тызенгаўза К. Б. Мейшутовіч і аўтар гэтых радкоў) у некаторай ступені аблегчыла няпростую задачу — выбраць сярод удзельнікаў самых дастойных узнагарод.

Барацьба за іх ішла нежартоўная. Усе маленькія спевакі пастараліся запом­ніцца гледачам, якіх, як заўсёды, было шмат, і яркімі касцюмамі, і адрэпеціраванымі нумарамі, і сваёй дзіцячай непасрэднасцю. Магчыма, некаторым праявіць сябе на сто працэнтаў у вакальным і артыстычным плане перашкодзілі хваляванне і невялікі вопыт выступлення на сцэне. Тым не менш кожнага артыста зала праводзіла шчырымі апладысментамі, як сапраўдных эстрадных зорак. Так жа цёпла гледачы віталі мінулагодніх пераможцаў “Пастаўскай зорачкі” і лаўрэатаў сёлетняга фестывалю “Пастаўскія зоркі”, якія выступалі ў гасцявым блоку.

Але конкурс ёсць конкурс. І ў ім, безумоўна, вызначыліся пераможцы. У малодшай узроставай групе (6—9 гадоў) гэта званне прысвоена салісту вакальнай студыі “Кропелькі” раённага Дома культуры Мікіту Аўгусціновічу. Другое месца заняла салістка вакальнай студыі “Юніта” РДК Ліза Загурская, трэцяе — яшчэ адна “кропелька” Даша Дрозд. Намнога больш прызёраў у старэйшай узроставай групе (10—13 гадоў). Трэцяе месца тут раздзя­лілі саліст вакальнай студыі Казлоўшчынскай СШ Дзяніс Шымук, “юнітчанка” Каця Жук і вучань СШ №5 Ва­дзім Казаровец. На дру­гім месцы вучаніца СШ №3 Ксенія Андрыеўская і салістка эстраднай студыі Варапаеўскай дзіцячай школы мастацтваў Са­ша Бар­шчэўская. На першым — са­лістка сту­дыі “Кропелькі” Каця Пякарская. Яе сяброўка па студыі Насця Брысь удастоена Гран-пры конкурсу і зван­ня “Пастаўская зорачка». Акрамя таго, спецыяльным дыпломам за артыстызм узнагароджана Ліза Глазава, якая таксама спявае ў “Кропельках”.

Разам з дыпломамі прызёры атрымалі падарункі — мяккія цацкі і сертыфікаты на пакупку дзіцячага адзення ад спонсараў фестывалю — аддзела культуры райвыканкама і магазінаў “Ладачкі”, “Беласнежка”, “Дзіцячы стыль”, “Пасаж”, “Аўтазапчасткі-Эка”. Астатнія канкурсанты ўзнагароджаны дыпломамі за ўдзел і сувенірамі.

 Алена ШАПАВАЛАВА.

Фота аўтара.