Взрыв на Лынтупском спиртзаводе. Есть жертвы

У сераду, 27 сакавіка, на Лынтупскім спіртзаводзе ў цэху брагарэктыфікацыі адбыўся выбух металічнай ёмкасці аб’­ёмам два кубічныя метры, у якой знаходзіўся сівушны спірт, з наступным гарэннем. Паведамленне пра гэта паступіла ў раённы аддзел па надзвычайных сітуацыях у 14 гадзін 12 хвілін. На месца здарэння аператыўна прыбылі пажарныя машыны з Лынтуп, Пастаў, Мядзела, Глыбокага. Ужо ў 14.16 пажар быў лака­лізаваны, а ў 14.18 — ліквідаваны.

У выніку ўзрыву ў цэху плошчай 30х30 метраў пашкоджаны рэктыфікацыйная і эпюрацыйная калоны, ёмкасць з сівушным спіртам, адбылося частковае абрушэнне і зрушванне лесвічных маршаў уздоўж тэхналагічных калон на вышыні 10 метраў, знішчана ашкляненне цэха, утварылася скразная трэ­шчына сцяны з першага на пяты паверх.

Але самае страшнае, што пацярпелі людзі. Якраз у гэты час у цэху з мэтай складання актаў уліку расходавання спірту знаходзіліся тры жанчыны-спецыялісты і слесар. 26-гадовая бухгалтар Яўгенія Бычкова атрымала траўмы, несумяшчальныя з жыццём, і праз некалькі га­дзін памерла ў цэнтральнай раённай бальніцы. У бухгалтара Данаты Сіманайць закрытая чэрапна-мазгавая траўма і ўдар галаўнога мозгу. Яна знаходзіцца ў рэа­німацыйным аддзяленні цэнтральнай раённай бальніцы, медыкі ацэньваюць стан пацярпелай як стабільны. У хімі­ка-лабаранта Анастасіі Джункоўскай і слесара Ігара Макрыцкага, якія зараз знаходзяцца ў хірургічным аддзяленні цэнтральнай раённай бальніцы,  — тэрмічныя апёкі, іх стан здавальняючы. Для аказання псіхалагічнай дапамогі пацярпелым і іх родным у ЦРБ арганізавана дзяжурства псі­хіятра.

Тэхналагічны пра­цэс на заводзе спынены. На месцы ўзрыву працуюць камісія па надзвычайных сітуацыях і следчыя органы. Следчым камітэтам Рэспублікі Беларусь па факце ўзрыву ўзбу­джана крымінальная справа.

Фаіна  Касаткіна.