Весну встретили, а зима не сдаётся (+ фото)

Напярэдадні свята провадаў Зімы многія рэгіёны Беларусі, у тым ліку сталіца, трапілі ў сапраўдны снежны палон. Такога бедства ў сярэдзіне сакавіка ніхто не чакаў. Шматлікім службам і людзям, якія змагаліся са стыхіяй і яе вынікамі, было не да ўрачыстасцей.

Паставы непагадзь абмінула, таму і вырашылі не здрадж­ваць народнай традыцыі.  А каб быць бліжэй да людзей, зрабіць іх непасрэднымі ўдзельнікамі спартыўных і забаўляльных конкурсаў і гульняў, праводзіць Зіму і сустракаць Вясну вырашылі на рыначнай плошчы.

— У аснову святочнай праграмы было пакладзена супрацьстаянне Зімы і Вясны, — расказвала дырэктар арганізацыйна-метадычнага цэнтра аддзела культуры райвыканкама Ксенія Грэська. — Самарэалізавацца Зіме і Вясне дапамаглі народныя калектывы “Заранка”, “Ві­танне”, народны аўтэнтычны гурт “Андроны”, самадзейныя артысты з г. п. Варапаева, Камай, Дунілавіч, інды­відуальныя выканаўцы з Навінак, Юнек, устаноў культуры іншых населеных пунктаў. Гучалі песні, прыпеўкі, жарты, карагодзілі танцоры. Самыя кемлівыя і спрытныя мераліся фізічнымі сіламі, сваёй знаходлівасцю, глыбінёй ведаў  народных звычаяў і традыцый.

Арганізатары свята шчодра частавалі прысутных блінамі, гарачым чаем. Масленічныя стравы прапаноў­валі работнікі гандлю раённага спажывецкага таварыства. Да духоўнага ўзбагачэння запрашалі майстры. Ды і ўвогуле, нягледзячы на марознае надвор’е, гандаль на кірмашы ішоў бойка.

Бліжэй да поўдня пацяплела, зазвінеў капеж, блакітам неба дыхнула вясна… Але яе сцэнічны прыход адбываўся на паўпустой пляцоўцы. Пакупнікі-гледачы разышліся, а тых, хто прыйшоў на свята, каб адпачыць, на самай справе аказалася вельмі мала, асабліва моладзі. Усё ж рынак, напэўна, не тое месца, каб на ім праводзіць такія мерапрыемствы.

 Тэкст і фота Пятра КУРЫЛОВІЧА.