Будут новоселья по улице Космонавтов

На вуліцу Касманаўтаў, што ў мікрараёне пятага гарадка, будаўнікі АБП “Рассвет Пастаўскі” вярнуліся праз шэсць гадоў. Столькі часу таму назад тут імі  быў здадзены ў эксплуатацыю 50-кватэрны дом жыллёва-будаўнічага кааператыва. Цяпер паблізу яго ўзвядуць яшчэ дзве пяціпавярхоўкі. З 80 будучых кватэр 15 адве­дзена пад сацыяльнае і службовае  жыллё. Работамі кіруе прараб участка Віталій Брыштэн.

— Апошнія пяць-шэсць гадоў сталі гадамі інтэнсіўнага будаўніцтва жылля ў райцэнтры, — адзначыў Ві­талій Уладзіміравіч. — За гэты час у мікрараёне вуліцы Юбілейнай пабудавана сем дамоў, навасёламі сталі 440 сем’яў. Нягледзячы на тое, што ў гэты перыяд адбываўся некаторы адток рабочай сілы, мы са сваімі задачамі спраўляліся, прымножылі вопыт будаўніцтва сучаснага жылля. Вось і сёлета дружна ўзяліся за работу. Пакуль на ўзвядзенні дома №32 “Б” заняты нямногім больш за 20 чалавек. Дзве брыгады пад кіраўніцтвам Часлава Мукеля і Васілія Гайдука вядуць мантаж падмурка. К канцу сакавіка можна будзе ўкладваць перакрыцці і прыступаць да кладкі.

багаты вопыт будаўніцтва жылля мае брыгада муляраў у складзе Сяргея Юрчанкі, Сяргея Волкава, Анатолія Лазовіка, Часлава Мукеля (брыгадзір), Васілія Рыжых і Аляксея Аляксеенкі

машыніст аўтакрана Аляксандр Александровіч.

Перабояў з пастаўкай матэрыялаў няма. Блокі будаўнікі завозяць з Варапаева і Маладзечна, выкарыстоў­ваюць уласныя вырабы. На іх разгрузцы і падачы на будаўнічую пляцоўку задзейнічаны два краны, адзін з якіх арандавалі ў Пастаўскім прадпрыемстве меліярацыйных сістэм. Растворам забяспечвае ўласная бетоназмяшальная машына. Вядуцца работы па пракладцы электралініі. Трэці тыдзень на будоўлі на дзве га­дзіны падоўжаны рабочы дзень. З пачаткам кладкі брыгады муляраў будуць працаваць у дзве змены. На дапамогу ім прыйдзе вежавы кран.

Побач з будоўляй будзе абсталяваны бытавы гарадок з вагончыкамі, які стане месцам часовага прыстанішча для дзясяткаў муляраў, аддзелачнікаў, рабочых ін­шых прафесій. Яны будуць працаваць тут амаль да канца года, бо здача дамоў у эксплуатацыю прадугледжана ў лістападзе і снежні.

— Тэрміны ўпаўне рэальныя, — падкрэсліў Віталій Брыштэн. —  Цяпер  рыхтуецца катлаван для закладкі падмурка пад другі дом. Работы на абодвух аб’ектах будзем весці адначасова. Для вонкавага мацавання блокаў  выкарыстаем спецыяльны клей, што ў нашай практыцы з’яўляецца новым. І, вядома ж, галоўная ўвага і кантроль на ўсіх стадыях будаўніцтва будуць звернуты на якасць выконваемых работ.