Все слова, цветы и песни — женщинам (+фото)

7 сакавіка ў раённым Доме культуры адбыліся ўрачысты сход і святочны канцэрт, прысвечаныя Дню жанчын.

Вітаючы прысутных, старшыня раённага выканаўчага камітэта В. С. Гутараў адзначыў, што беларускія жанчыны складаюць большасць насельніцтва краіны, таму іх уклад у развіццё грамадства вельмі значны. Высокі культурны і адукацыйны ўзровень жанчын дазваляе ім годна канкурыраваць з прадстаўнікамі моцнага полу ў палітыцы, навуцы, бізнесе, культуры, медыцыне. Самай высокай адзнакі заслу­гоў­ваюць жанчыны за сваю мэтанакіраванасць і адказнасць, выкананне мацярынскага абавязку. Клопат аб іх, усямерная падтрымка мацярынства, дзяцінства і сям’і з’яўляюцца прыярытэтным кірункам сацыяльнай палітыкі нашай дзяржавы. Асаблівая ўвага надаецца мнагадзетным сем’ям. На Пастаўшчыне іх 323. Дзеці выхоўваюцца таксама ў 25 апякунскіх і 24 прыёмных сем’ях. У мінулым годзе і  сёлета 20 мнагадзетных сем’яў палепшылі свае жыллёвыя ўмовы.

Словы шчырай удзячнасці В. С. Гутараў адрасаваў ветэранам вайны і працы, кіраўнікам прадпрыемстваў, арганізацый і ўстаноў, перадавікам вытворчасці, якія ўдастоены звання “Чалавек года Пастаўшчыны”. Ён пажадаў усім пастаўчанкам здароўя, кахання, міру і згоды, здзяйснення ўсіх жаданняў. Кіраўнік раённай вертыкалі ўручыў ордэны Маці Таццяне Вітальеўне Абуховіч з г. п. Варапаева і Вользе Мікалаеўне Мурзіч з Навасёлкаўскага сельсавета, якія нарадзілі і выхоўваюць па пяць дзяцей. А ўсяго на Пастаўшчыне найвышэйшай узнагародай — ордэнам Маці — адзначаны 18 жанчын.

Сонечнай, светлай, напоўненай пяшчотай выглядала сцэна раённага Дома культуры. Такі настрой панаваў і ў зале. Стварылі яго ўдзельнікі мастацкай самадзейнасці, выхаванцы дзіцячых садоў “Сонейка”, “Спадарожнік” і “Рамонак”, узорных эстраднай і цыркавой студый раённага Дома культуры, юныя спартсмены футбольнай акадэміі ПМЦ.

  Тэкст і фота Пятра КУРЫЛОВІЧА.