И москвича сделает стильным «Инита»

Майстар швейнага цэха Н. Б. Храпавіцкая (злева) і закройшчык С. З. Рамановіч з узорам прадукцыі прадпрыемства.

Калектыў гэтага прыватнага прадпрыемства чыста жаночы. А вось прадукцыя, якую ён выпускае, прызначана выключна для прадстаўнікоў моцнай паловы.

На айчынным рынку тавараў лёгкай прамысловасці мужчынскія касцюмы ТАА “Ініта” з’явілі­ся ў 1993 годзе і хутка заваявалі папулярнасць у пакупнікоў. Доўгі час яны шыліся ў Мінску. Але два гады назад частка вытворчасі пераехала ў Паставы, на радзіму дырэктара прадпрыемства С. Д. Рубашко. Змяніўся таксама юрыдычны адрас “Ініты”, якая цяпер афіцыйна зарэгістравана па вуліцы Гагарына ў райцэнтры.  Тут у спецыяльна ўзве­дзеным будынку на месцы былой псіхіятрычнай бальніцы арганізаваны раскрой усяго адзення, цалкам шыюцца штаны і часткова — пінжакі, плашчы, смокінгі і фракі: у Паставах робяцца іх элементы, а зборка праводзіцца ў Мінску. У планах Сяргея Дзмітрыевіча стварыць у нашым горадзе паўнацэнны ўчастак па пашыве пінжакоў.

Гатовая прадукцыя пастаўляецца ў гандлёвую сетку сталіцы, іншых беларускіх гарадоў, у тым ліку яе можна купіць у фірменным магазіне “Ініты”, які адкрыўся каля года назад на рагу вуліц Чырвонаармейскай і Юбілейнай у райцэнтры. А таксама ідзе за мяжу. У прыватнасці, зараз прадпрыемства працуе толькі на Маскву. Але ў канцы сакавіка-красавіку збіраецца аднавіць пастаўкі ў магазіны Мінска, пакупнікі якіх ужо цікавяцца, куды падзеліся інітаўскія касцюмы. Купляюць іх людзі пераважна высокага дастатку, бо касцюмы даволі дарагія — каштуюць каля 1,5-2 мільёнаў рублёў. Такая цана апраўданая, паколькі адзенне шыецца з натуральных імпартных тканін на сучасным нямецкім абсталяванні. Нават ніткі і іголкі, якія выкарыстоўваюць у рабоце швачкі, імпартныя. Праўда, для фірменнага магазіна ў Паставах Сяргей Дзмітрыевіч зрабіў выключэнне: тут можна набыць камплект-“двойку” са змесавай  (са значным утрыманнем сінтэтычных валокнаў) тканіны ўсяго за 850 тысяч рублёў.

Напрацаваны гадамі імідж і кліенцкую базу падтрымліваць няпроста, асабліва ў сучасных умовах канкурэнцыі на рынку. Таму вялікая ўвага на прадпрыемстве надаецца якасці прадукцыі. А яна, як вядома, залежыць ад прафесіяналізму работнікаў.

Сёння пастаўскі калектыў “Ініты” налічвае 15 чалавек. Жанчыны ў асноўным маладыя, адказныя, з даведзенымі нормамі выпрацоўкі спраўляюцца. Усе яны жадаюць працаваць і гатовы ўдасканальваць сваё майстэрства. Нягледзячы на тое, што кожная выконвае пэўную аперацыю, усе працуюць адзінай камандай і стараюцца не падвесці сябровак, бо ведаюць: памылка адной абавязкова пацягне за сабой недакладнасці ў рабоце іншых. Умовамі працы і зарплатай швачкі і закройшчыцы задаволены. Радуюцца таксама, што не бывае прастояў у рабоце, прадпрыемства развіваецца і паступова нарошчвае аб’ёмы вытворчасці. А яго фінансавая стабільнасць — гэта і стабільнасць у сем’ях жанчын.

Алена ШАПАВАЛАВА.

Фота аўтара.