Ударно поработали молодые поставчане

5 снежня ў Віцебску адбылося ўрачыстае закрыццё працоўнага семестра-2012. Яно сабрала маладых актывістаў, кіраўнікоў устаноў адукацыі вобласці, прадстаўнікоў раённых і гарадскіх выканаўчых камітэтаў, якія каардынуюць дзейнасць студэнцкіх атрадаў.
Галоўнай падзеяй мерапрыемства стала ўзнагароджанне арганізатараў часовай занятасці моладзі, наймальнікаў, байцоў і камандзіраў студатрадаў Віцебскай вобласці. Сярод пераможцаў аказаліся і пастаўчане — ім пакарыліся пяць з чатырнаццаці намінацый.

Найлепшым камандзірам студэнцкага атрада прызнаны навучэнец прафтэхкаледжа Вадзім Пішч. Званне найлепшага наймальніка дасталася ААТ “Камайскі-агра”. Райкам “БРСМ” адзначаны як найлепшая раённая арганізацыя ГА “БРСМ” у галіне другаснай занятасці моладзі — яго работнікі атрымалі ў падарунак новенькі камп’ютарны манітор. Пастаўскі райвыканкам названы найлепшым раённым штабам па каардынацыі дзейнасці студатрадаў. А перамогу ў намінацыі “Найлепшы штаб працоўных спраў устаноў адукацыі, якія забяспечваюць атрыманне прафесійна-тэхнічнай адукацыі” святкаваў штаб працоўных спраў Пастаўскага прафтэхкаледжа.
Што садзейнічала такому паспеху?

— Зладжаная праца, — адказала першы сакратар райкама ГА “БРСМ” Іна Кацейка. — Мы былі адной камандай і працавалі па-максімуму. Дзякуючы актыўнаму садзейнічанню кіраўнікоў гаспадарак, навучэнцаў, работнікаў прафтэхкаледжа, школьнікаў раёна і падтрымцы раённых улад вынікі нашай працы такія паспяховыя. На працягу працоўнага семестра, з 1 мая па 30 верасня 2012 года, мы ўладкавалі 885 чалавек пры плане 240 (сярод іх 781 — непаўналетнія). Моладзь працавала на ўзвядзеннях дамоў №№ 25 і 26 па вуліцы Юбілейнай, займалася добраўпарадкаваннем малочнатаварных фермаў у Шырках, Кейзіках, Лучаі і іншых населеных пунктах раёна, шчыравала на зернескладах ААТ “Сцяг Перамогі-агра”, ААТ “Хацілы-агра”, ААТ “Дунілавічы-агра”, ААТ “Пастаўскі райаграсэрвіс”, дапамагала ўбіраць сельгаспрадукцыю на палях ААТ “Камайскі-агра”, ААТ “Хацілы-агра”, ААТ “Блакітныя азёры-агра”… Пры падвядзенні вынікаў улічвалася не толькі колькасць працаўладкаваных, але і ўзровень аплаты, якасць і аб’ёмы выкананай работы. Безумоўна, мы вельмі задаволеныя вынікамі і будзем імкнуцца памножыць іх у наступным годзе.

Іна СНЯЖКОВА. 
Фота аўтара.