Поставы — самый поющий город Беларуси! Браво, Юлия Жидкая!

Познім вечарам 8 снежня ля экранаў тэлевізараў спачатку балелі, а затым лікавалі сотні, а можа, і тысячы пастаўчан — наша Юлія Жыдкая выступала ў фінале музычнага конкурсу “Спяваючыя гарады”, які праводзіў тэлеканал “СТБ”, і перамагла ў ім. Дзяўчына настолькі кранальна і прафесійна выканала песню Вікторыі Алешка “Засталася”, што гледачы падчас тэлефоннага галасавання аддалі ёй 5506 галасоў. Адрыў ад случчан, якія ішлі ўслед за Юляй, склаў 324 галасы. А некаторыя фіналісты (нагадаем, што ў фінал трапіла 20 нумароў) набралі менш за тысячу галасоў.

Дзякуючы Юліі Паставы прызнаны самым спяваючым горадам. Асабліва шчаслівымі за перамогу сваёй выхаванкі былі кіраўнік узорнага аматарскага калектыву эстраднай вакальнай студыі “Юні­та” Пастаўскага РДК Аксана Нікалаева, у якой дзяўчына займаецца, і Юлін куратар на тэлепраекце, вядомая беларуская спявачка Вікторыя Алешка. Хапіла перажыванняў баць­кам Юліі, яе групе падтрымкі, настаўнікам, аднакласнікам з СШ № 3, ды і ўсім, хто балеў за сціплую і таленавітую дзяўчыну.

У нядзелю ў Паставы разам з Вікторыяй Алешка прыехала здымачная група тэлеканала “СТБ”, і вечарам таго ж дня прайшоў сюжэт пра пераможцу тэлепраекта “Спяваючыя гарады”. У родным горадзе Юлію цёпла віншавалі з перамогай. Ну а на шквал тэлефонных званкоў дзяўчына літаральна не паспявала адказваць…

З перамогай Юлію павиншаваў старшыня раённага выканаўчага камітэта В. С. Гутараў:  » Віншую Юлію з перамогай! Жадаю заставацца сціплай і мэтанакіраванай, назаўсёды пакарыць вялікую сцэну.

Дзякую Юліным бацькам, педагогу па вакале Аксане Нікалаевай, куратару Вікторыі Алешка і ўсім, хто дапамагаў рыхтавацца да выступленняў, усім пастаўчанам за актыўную падтрымку нашай зорачкі падчас галасавання. Няхай родны горад назаўсёды застанецца самым пеўчым! Няхай спявае душа ў таленавітых творцаў!».

Брава, Юлія! І новых табе творчых поспехаў.

Фаіна КАСАТКІНА. 

Фота Пятра КУРЫЛОВІЧА.