Поставская делегация с ответныи визитом посетила литовский Рокишкис

22 лістапада ў літоўскім горадзе-пабраціме Пастаў Рокішкісе адбыліся адкрыццё фотавыставы вядомага беларускага фатографа Сяргея Плыткевіча і канцэрт народнай артысткі Расійскай Федэрацыі, ураджэнкі Пастаўшчыны Лідзіі Абрамавай. Яны прайшлі ў рамках другога сумеснага праекта, які рэалізуецца нашым Цэнтрам турысцкіх паслуг і турыстычнай фірмай з Ро­кішкіса пры актыўнай падтрымцы ўлад (першым з’яўляецца праект паміж Пастаўскім райвыканкамам і самакіраваннем Рокішкскага раёна па аднаўленні культурна-гістарычнай спадчыны рода Тызенгаўзаў).

Названыя мерапрыемствы сталі адказам на аналагічныя літоўскія фотавыставу і канцэрт, якія прайшлі ў канцы кастрычніка ў Паставах (пра іх раённая газета ўжо расказвала на сваіх старонках). Месцам правядзення дадзеных стаў Рокішкскі раённы музей, які размясціўся ва ўнікальным архітэктурным комплексе — палацы, што належаў роду Тызенгаўзаў і выдатна захаваўся да нашых дзён. У іх прынялі ўдзел віцэ-мэр Рокішскага раённага самакіравання Эгідзіюс Вілімас, які выступіў з прывітальным словам, а таксама афіцыйная дэлегацыя Пастаўскага раёна ў складзе намесніка старшыні райвыканкама Ю. М. Кісялёва, начальніка аддзела ідэалагічнай работы Г. М. Чаплінскай і дырэктара Цэнтра турысцкіх паслуг Я. Ч. Шушкевіча.

— Калі гаварыць пра выставу, яна арганізавана на высокім мастацкім узроўні, што адзначылі як віцэ-мэр Рокішкіса, так і іншыя наведвальнікі, — расказаў Ю. М. Кісялёў. — Сяргей Плыткевіч творча падышоў да выканання сваёй задачы і не проста сфатаграфаваў тое, што спадабалася на рокішкскай зямлі, а правёў паралелі паміж гісторыяй, прыродай, людзьмі нашых краін. На фотаздымках адлюстраваны беларускія і літоўскія прыродныя ландшафты, моманты свят, якія праходзілі у Паставах і Рокішкісе, і інш. Гэта выклікала вялікі інтарэс у гаспадароў, якія на свае вочы змаглі пераканацца ў тым, што нашы землі і людзі сапраўды падобныя і іх вельмі многае звязвае.

Не меншую цікавасць праявілі літоўцы і да канцэрта Лідзіі Абрамавай. Камерная зала музея, дзе ён праходзіў, была запоўнена гледачамі. Яны вельмі цёпла прынялі спявачку, якая пасля выступлення прызналася, што гэта быў самы лепшы яе канцэрт за апошні год. А таксама адзначыла асаблівую атмасферу, якая панавала ў музеі, чуласць, сардэчнасць і ўменне цаніць прыгожае, высокае мастацтва, якія ўласцівы як пастаўчанам, так і жыхарам Рокішкіса.

Са свайго боку віцэ-мэр раённага самакіравання Эгідзіюс Вілімас ад імя мясцовай улады падзякаваў Л. Абрамавай за тое, што пераадолела няблізкі шлях з Масквы, каб парадаваць аматараў опернай музыкі і ўсіх гараджан. Таксама ў канцы мерапрыемства выступіў Ю. М. Кісялёў, які выказаў удзячнасць гаспадарам за цёплы прыём, добрыя ўмовы для правядзення фотавыставы і канцэрта, ініцыятывы, якія зыходзяць ад літоўцаў. Акрамя таго, Юрый Мікалаевіч выказаў надзею на тое, што пачатае супрацоўніцтва будзе працягвацца і пашырацца не толькі ў культурнай, але і ў іншых сферах, і наперадзе нас чакаюць новыя сумесныя праекты.

Алена ШАПАВАЛАВА.