Хроніка здарэнняў

Днём 29 жніўня з дома 81-гадовага жыхара вуліцы Маякоўскага ў Паставах прапалі буйныя сумы долараў ЗША, еўра і беларускіх рублёў, а таксама 2 залатыя пярсцёнкі — усяго больш чым на 28 мільёнаў рублёў. Украсці грошы і золата злодзею (а яго асоба пакуль не ўстаноўлена) аказалася нескладана: гаспадар, выйшаўшы з хаты, пакінуў яе незамкнёнай. Некалькімі днямі раней таксама з незамкнёнай кватэры па вуліцы Заводскай у райцэнтры былі ўкрадзены прадукты харчавання. У дадзеным выпадку злачынства аказалася справай рук 54-гадовага непрацуючага грамадзяніна, які пражывае па суседстве з пацярпелым.

* * *

Дарэмна радавалася вырашчанаму на сваім прысядзібным участку ўраджаю жыхарка вуліцы Набярэжнай з вёскі Навасёлкі-1. Замест гаспадыні яго сабралі злодзеі. Спачатку ноччу яны выбралі каля 2 кілаграмаў цыбулі, а праз тыдзень пад покрывам цемры ўкралі 48 кілаграмаў памідораў і 12 кілаграмаў салодкага перцу. Па факце крадзяжу ўзбуджана крымінальная справа, вядзецца пошук злачынцаў.

* * *

У адну са жнівеньскіх начэй у гараж, размешчаны ў двары дома жыхара вуліцы Маладзёжнай у вёсцы Парыж, пранік злодзей. Сарваўшы навясны замок, ён украў запчасткі ад аўтамабіля і два камбінезоны на агульную суму больш за 1 мільён рублёў. А вось у пастаўчаніна, які пражывае па вуліцы Чырвонаармейскай, ноччу нехта выцягнуў з іншамаркі, што стаяла незамкнёная каля дома, дарагую аўтамагнітолу. Хто здзейсніў злачынствы, пакуль невядома.

* * *

Факты насілля ў сям’і — не рэдкасць. Найчасцей руку на сваіх дамачадцаў паднімаюць мужчыны, а іх ахвярамі, як правіла, становяцца жонкі і сужыцелькі. Многія з іх, не вытрымаўшы сямейнай тыраніі, звяртаюцца затым у міліцыю. Нядаўна з такой заявай у РАУС прыйшла 40-гадовая пастаўчанка, якую перыядычна збіваў нецвярозы сужыцель. Пасля праведзенай праваахоўнікамі праверкі ў адносінах да мужчыны была ўзбуджана крымінальная справа.

* * *

У жніўні Пастаўскім раённым аддзелам Следчага камітэта Рэспублікі Беларусь узбуджаны тры крымінальныя справы ў адносінах да жыхароў райцэнтра, якія незаконна захоўвалі ў сябе дома небяспечнае наркатычнае рэчыва — экстракцыйны опій. Усе трое абвінавачаных, сярод якіх адна жанчына, нідзе не працуюць і ўжо маюць за плячыма судзімасці. Двое былі асуджаны за захоўванне наркотыкаў, адзін — за крадзеж.

Па зводках РАУС падрыхтавала Алена ШАПАВАЛАВА.