Первый звонок в поставской школе № 5

Старшыня райвыканкама В. С. Гутараў віншуе з пачаткам навучальнага года дырэктара СШ № 5 В. М. Ромель.

Дзень нараджэння новага навучальнага года — свята, поўнае эмоцый. Радасць першай сустрэчы са школай і сум хуткага расставання з ёй, неахвотнае развітанне з летнім адпачынкам і прадчуванне новых вучэбных адкрыццяў — усе гэтыя пачуцці ў Дзень ведаў бралі верх над астатнімі.

А якое свята без гасцей і падарункаў? У пастаўскай СШ № 5 сёлета яны былі асабліва ганаровымі і прыемнымі.

Галоўнымі героямі свята былі, безумоўна, першакласнікі і выпускнікі. Калі адны пераступалі парог нясмела і хвалюючыся, то другія адчувалі сябе як дома.

Першы раз у першы клас з настаўніцай Я. І. Скіпар.

Усе школьнікі пачулі ў свой адрас дзясяткі віншаванняў і пажаданняў. Першай сказала слова новы дырэктар школы Валянціна Міхайлаўна Ромель. Яна пажадала, каб навучальны год быў лёгкім і плённым, прынёс вялікую колькасць пазітыўных момантаў. Асобныя словы Валянціна Міхайлаўна выказала ў адрас першакласнікаў:

— Нічога не бойцеся, упэўнена крочце па дарозе школьнага жыцця. Вас чакаюць светлы клас і добрая настаўніца, новыя сябры. Мы вельмі рады бачыць вас у нашай школьнай сям’і! У добры шлях!
Ганаровым госцем урачыстай лінейкі стаў старшыня райвыканкама Віктар Сяргеевіч Гутараў.

— Для нас, прадстаўнікоў улады, вельмі важна, каб дзеці атрымалі добрую адукацыю і ўступілі ў дарослае жыццё падрыхтаванымі людзьмі. Таму на сістэму адукацыі грошай не шкадуем — сёлета з бюджэту затрачана 66 мільярдаў рублёў, і гэта самая вялікая частка расходаў, — адзначыў Віктар Сяргеевіч. — СШ № 5, як і іншыя пастаўскія школы, сустрэла вучняў і настаўнікаў утульнай і камфортнай. Але невялікія праблемы ёсць. Абавязуюся ўзяць шэфства над школай і дапамагаць вырашаць праблемы.

Старшыня райвыканкама пажадаў вучням пасля заканчэння школы паступіць у вышэйшыя навучальныя ўстановы, вярнуцца на Пастаўшчыну падрыхтаванымі спецыялістамі і працаваць на карысць роднай зямлі.
Віктар Сяргеевіч уручыў дырэктару школы дакументы ад новага камп’ютара. І гэта быў не адзіны падарунак навучальнай установе ў той дзень. Прадстаўнік вайсковай часці 1257 Іван Паўлавіч Пішчулоў прэзентаваў школе настольную гульню. “Хай урокі будуць нясумнымі, кнігі — цікавымі, а сяброўства — моцным”, — пажадаў вайсковец.

Адзінаццацікласнікі з класным кіраўніком А. А. Храпун.

Першакласнікі атрымалі ў падарунак ад Прэзідэнта Рэспублікі Беларусь Аляксандра Рыгоравіча Лукашэнкі кнігу “Беларусь — наша Радзіма”, якую ім уручылі адзінаццацікласнікі. А разам з ёй — прыгожыя паветраныя шары, каб такім жа прыгожым было іх школьнае жыццё.

Шчырыя словы віншаванняў гучалі таксама ад намесніка начальніка Пастаўскага раённага аддзела па надзвычайных сітуацыях Віктара Анатольевіча Жука, ветэрана працы, настаўніцы вышэйшай катэгорыі Тамары Аркадзьеўны Сіроткі.

Працоўныя будні школьнікаў пачаліся. І хоць яны будуць менш урачыстымі, чым першая лінейка, усё роўна прынясуць шмат светлых эмоцый і прыемных падзей.

Іна СНЯЖКОВА.
Фота аўтара.