Выборы-2012: началась агитация

Рэгістрацыя кандыдатаў у дэпутаты Палаты прадстаўнікоў Нацыянальнага сходу ў краіне завершана. За 110 дэпутацкіх крэслаў будуць змагацца 363 чалавекі. Чатыры гады назад кандыдатаў было амаль на сотню менш.

Большасць зарэгістраваных кандыдатаў — прадстаўнікі палітычных партый. У гутарцы з журналістамі старшыня Цэнтральнай выбарчай камісіі Лідзія Ярмошына і параўнала, што ў кампаніі 2008 года ўдзельнічала толькі 50 партыйцаў, а зараз — 206. У многім гэта тлумачыцца ўнесенымі два гады назад змяненнямі ў Выбарчы кодэкс. Раней партыя магла вылучаць прэтэндэнтаў у дэпутаты ў канкрэтнай акрузе толькі ў тым выпадку, калі існуе мясцовая зарэгістраваная ячэйка партыі. Цяпер такога патрабавання няма.

Упершыню дзейнічаюць і іншыя змяненні. Напрыклад, на гэты раз лягчэй было працаваць зборшчыкам подпісаў: не трэба было завяраць падпісныя лісты ў выканкаме. Але гэта новаўвядзенне не засцерагло многіх ад памылак. 122 суіскальнікі зняты з гонкі з-за праблем з прадстаўленымі ў Цэнтрвыбаркам дакументамі. Адна з тыповых прычын для адмовы ў рэгістрацыі — вялікая колькасць несапраўдных подпісаў. Дастаткова шмат было і недакладнай інфармацыі ў дэкларацыях аб даходах. 9 патэнцыяльных кандыдатаў пасля рэгістрацыі самі рашылі зняцца з выбараў.

Як паведаміла старшыня Цэнтральнай выбарчай камісіі, за месцы ў Парламенце пазмагаюцца 21 дзеючы дэпутат і 39 дэпутатаў з мінулых скліканняў.

Зараз вядзецца перадвыбарная агітацыя кандыдатаў у дэпутаты. Выступаць з перадвыбарнымі праграмамі па дзяржаўным радыё і тэлебачанні прэтэндэнты на месца ў парламенце пачалі з 27 жніўня. У дзень рэгістрацыі для кожнага з іх шляхам жараб’ёўкі вызначылі дату і час выступленняў.

Сакратар Цэнтрвыбаркама Мікалай Лазавік нагадаў, што перадвыбарныя выступленні, як і ўдзел у тэле- і радыёдэбатах, — справа добраахвотная. «Калі які-небудзь кандыдат лічыць, што іншыя спосабы агітацыі, асабістыя сустрэчы, напрыклад, больш эфектыўныя, палічыць за лепшае выкарыстоўваць больш магчымасцей для непасрэдных размоў з выбаршчыкамі, то гэта яго права»,— падкрэсліў ён.

Акрамя выступленняў у тэле- і радыёэфіры кандыдат у дэпутаты мае права апублікаваць сваю перадвыбарную праграму ў адной з рэспубліканскіх газет — «Звяздзе», «Народной газете», «Рэспуб­ліцы», «Белорусской ниве». Прэтэндэнт на дэпутацкае крэсла можа выбраць адпаведную абласную газету або раённыя, гарадскія газеты, якія выдаюцца на тэрыторыі выбарчай акругі і з’яўляюцца дзяржаўнымі ці часткова фінансуюцца з рэспубліканскага або мясцовага бюджэту, або адным з заснавальнікаў якіх выступаюць дзяржаўныя органы ці арганізацыі.

Тэкст перадвыбарнай праграмы, падпісаны кандыдатам у дэпутаты Палаты прадстаўнікоў, павінен быць прадстаўлены ў рэдакцыю газеты не пазней за 2 верасня 2012 года на папяровым і электронным носьбітах. Пры апублікаванні перадвыбарных праграм захоўваецца чарговасць іх паступлення, якая вызначаецца на падставе асобнай рэгістрацыі ў рэдакцыях газет з пазначэннем даты і часу паступлення кожнай праграмы.

Перадвыбарная агітацыя ў Беларусі прадоўжыцца да 22 верасня ўключна. Асноўны дзень галасавання на выбарах дэпутатаў Палаты прадстаўнікоў назначаны на 23 верасня.