Опрос: где прводят отпуска поставчане?

Заканчваецца лета, а з ім — і водпускі. Як адпачывалася? Гэтым карэспандэнт “Пастаўскага краю” Анна Анішкевіч пацікавілася ў некаторых пастаўчан.

Ала ЧАРНЮК, 

дырэктар раённага Дома культуры:

— Сёлета падчас водпуску рашыла ў чарговы раз пападарожнічаць па Еўропе. Раней была ў Харватыі, Аўстрыі і Італіі. Цяпер наведала Польшчу, Германію, Галандыю, Бельгію, Францыю, Іспанію, Швейцарыю, Чэхію. Незабыўныя ўражанні засталіся ад Гамбурга, Парыжа, Марселя, Бруселя, Барселоны, Жэневы, Амстэрдама. Пабывала ў адной з самых маленькіх краін Еўропы — Андоры, наведала санктуарый Маці Божай Чанстахоўскай. Быў і адпачынак на беразе Міжземнага мора. Прайшло колькі часу, як прыступіла да работы, а перад вачыма стаяць замкі Баварыі, швейцарская рыўера, іншыя славутасці.

Алена БУРАК, 

ветурач ААТ “Навасёлкі-Лучай”:

— Летась закончыла ветэрынарны факультэт Віцебскай дзяржаўнай акадэміі ветэрынарнай медыцыны і паступіла на завочнае аддзяленне факультэта ветсанэкспертызы. Таму сёлета частку водпуску правяла ў асноўным за падручнікамі і ў інтэрнэце — пісала кантрольныя работы, рыхтавалася да чарговай сесіі. Але адпачывала таксама: гуляла на вяселлі сяброўкі, выязджала з сябрамі на азёры Пастаўшчыны, у лес па ягады і грыбы. Родныя мясціны, чыстае паветра, сяброўская атмасфера — што яшчэ трэба для адпачынку?

Валянціна ШАТКОЎСКАЯ, 

аператар камп’ютарнага набору 

райгазеты “Пастаўскі край”:

— У каторы раз выбіраю для адпачынку Турцыю. Гэта краіна — не толькі шыкоўныя атэлі, а яшчэ і экскурсіі. Пабывала ў чатырохмінарэтнай мячэці, у старажытным горадзе Сідэ, дзе ўбачыла рымскі амфітэатр, любавалася прыгожым вадаспадам Манаўгат. У Турцыі вельмі адкрытыя і дружалюбныя людзі, якія паважаюць свае традыцыі і культуру. Мне даводзілася самастойна на маршрутных аўтобусах выязджаць за межы курортнай зоны. Па дарозе мясцовыя жыхары часта падказвалі, раілі, і гэта была шчырая дапамога.

А мора бывае розным: спакойным, бурным, шэрым, сінім, але заўсёды прыцягвае да сябе, як магніт. Адзін раз пабываўшы там, будзеш наяве і ў сне марыць аб вяртанні ў яго абдымкі.

Анна МІСУНА, 

майстар філіяла “Пастаўскае ДРБУ-132”:

— У сувязі з вытворчай неабходнасцю мы, дарожнікі, водпуск звычайна дзелім на дзве часткі — па два тыдні. Кожны год стараюся купіць пуцёўку ў санаторый. Даводзілася адпачываць у Лётцах, Трускаўцы, у Крыме, санаторыях, размешчаных на Нарачы. Сёлета была ў “Прыазёрным”. Два тыдні комплекснага лячэння, цікавая забаўляльная праграма. Цяпер працую, але ў запасе яшчэ ёсць два тыдні. Жыву ў чаканні новых уражанняў.

А чем запомнился отпуск Вам, дорогие читатели?