Поставские строители на достигнутом не останавливаются (+ фото)

Сітуацыя, калі будаўнікі АБП “Рассвет Пастаўскі” звальняліся з прадпрыемства, летась і сёлета мела месца. Але яна, мяркуючы па прысутных на ўрачыстасці з нагоды прафесійнага свята, якая адбылася 11 жніўня ў раённым Доме культуры, не вельмі паўплывала на колькасны склад галоўнай будаўнічай арганізацыі раёна і аб’яднання “Полацк­сельбуд”. На змену тым, хто пакінуў калектыў, прыйшлі маладыя будаўнікі, ды і некаторыя “ўцекачы за лепшай доляй” паспелі вярнуцца назад.

“Рассвет Пастаўскі”, які валодае магутнай матэрыяльна-тэхнічнай базай і мае  слаўныя традыцыі, не выглядае абяссіленым прадпрыемствам, і пацвярджэннем таму з’яўляюцца ўзводзімыя ім аб’екты: сучасны цэх па вытворчасці цвёрдых сыроў, новы будынак Дунілавіцкага дома-інтэрната для састарэлых, 60-кватэрны жылы дом, робатызаваная малочнатаварная ферма ў ААТ “Навасёлкі-Лучай” і іншыя будоўлі. У першым паўгоддзі на іх асвоена 30 мільярдаў рублёў інвестыцый, што складае амаль чацвёртую частку ад агульнага аб’ёму, выкананага астатнімі 14 арганізацыямі “Полацксельбуда”. Ужо ў чэрвені месячная заработная плата ў будаўнікоў  вядучых прафесій у пераразліку склала 500 долараў. Прадпрыемства выконвае ўсе фінансава-эканамічныя паказчыкі.

— Шлях да гэтага быў няпросты, — адзначыў, звяртаючыся да прысутных у зале, дырэктар аграбудпрадпрыемства Альфрэд Малец. — Нямала было бяссонных начэй, роздумаў, перажыванняў, але я верыў у калектыў, яго вялікія патэнцыяльныя магчымасці, якія мы здолелі ўвасобіць у канкрэтныя справы. А таму і праца кожнага з вас заслужана адзначана на ўсіх узроўнях.

Станоўча ацанілі прымаемыя кіраўніцтвам меры па стабілізацыі работы галіны і яе ўкладзе ў выкананне прагнозных паказчыкаў сацыяльна-эканамічнага развіцця дэпутат Палаты прадстаўнікоў Нацыянальнага сходу Рэспублікі Беларусь Эдуард Казура, старшыня раённага Савета дэпутатаў Віктар Арэхаў, старшыня раённай арганізацыі прафсаюза работнікаў аграпрамысловага комплексу Баляслаў Шылько, іншыя за­прошаныя і госці свята.

Найлепшым паказчыкам таго, што прад­прыемства жыве, мае сродкі, з’явілася ўшанаванне ветэранаў працы, асобных работнікаў, прарабскіх участкаў, будаўнічых брыгад, лепшых па прафесіі, маладых будаўнікоў. У спісе узнагароджаных Ганаровымі граматамі, Падзякамі, дыпломамі і грашовымі прэміямі  дзясяткі прозвішчаў. Адміністрацыя і прафкамітэт, а таксама работнікі раённага Дома культуры і ўдзельнікі мастацкай самадзейнасці надалі гэтай цырымоніі асаблівую ўрачыстасць і святочнасць, не пашкадавалі сродкаў і добрых слоў, песень для тых, хто не лічыцца з цяжкасцямі, працягвае працоўныя традыцыі рассветаўцаў.

Святкаванне Дня будаўніка ў Паставах паказала, што калектыў АБП “Рассвет Пастаўскі” не збіраецца спыняцца на дасягнутым, тым больш што аб’ёмы будаўніцтва ў раёне і сумежных рэгіёнах будуць павялічвацца.

Тэкст і фота Пятра КУРЫЛОВІЧА.