Помощь поставских медиков стала ещё более скорой

Нарматывамі Міністэрства аховы здароўя Рэспублікі Беларусь прадугледжана на дзесяць тысяч насельніцтва мець адну санітарную машыну. У зоне дзеяння аддзялення хуткай і неадкладнай медыцынскай дапамогі Пастаўскай цэнтральнай райбаль­ніцы 26770 чалавек, якіх абслугоўваюць фельчары на трох машынах. Такой колькасці транспартных сродкаў дастаткова для таго, каб своечасова аказаць дапамогу чалавеку. А яна стала яшчэ больш “хуткай”.

Дзякуючы ініцыятыве адміністрацыі ЦРБ і галоўнага ўрача Уладзіміра Чакавага, падтрымцы райвыканкама, у гэтым годзе завершана абнаўленне санітарных машын ад­дзялення хуткай дапамогі. Першая “Газэль” з’явілася яшчэ ў лютым 2009 года. Пастаўскім медыкам яна  была выдзелена ўпраўленнем аховы здароўя аблвыканкама за перамогу ў абласным спаборніцтве. У сакавіку гэтага года парк папоўніўся новым аўтамабілем “Фольксваген-Крафтэр”, які з поўным правам  можна назваць рэанімацыяй на колах. І вось зусім нядаўна, у пачатку жніўня, яшчэ адна “Газэль” з надпісам на беларускай мове “Хуткая медыцынская дапамога” замяніла “УАЗік”.

— Усяго на пакупку дзвюх аўтамашын і абсталявання раённы выканаўчы камітэт выдзеліў з бюджэту больш за 900 мільёнаў рублёў, — ад­значыў галоўны ўрач УАЗ “Пастаўская ЦРБ” Уладзімір Чакавы. —  Яны акупяцца ўмацаваннем здароўя дарослага насельніцтва і дзяцей.

Частата выклікаемасці “хуткай” дапамогі на Пастаўшчыне ў параўнанні з іншымі раёнамі вобласці з’яўляецца адной з самых высокіх у горадзе і на сяле. Так, напрыклад, у ліпені па дапамогу толькі ў пастаўскае аддзяленне звярнулася 776 чалавек. Усе яе па меры неабходнасці атрымалі.

Яшчэ хвіліна — і санітарныя машыны раз’едуцца па адрасах выклікаў; разам з іншымі кваліфікаваную дапамогу насельніцтву аказваюць фельчары Юрый Габец, Анастасія Скітава, Лілія Танана.

Фота Пятра КУРЫЛОВІЧА.