Когда мы перестанем вдыхать «ароматы» очистных сооружений Поставского молочного завода?

Абсталяванне ачышчальных збудаванняў Пастаўскага малаказавода ўжо працуе, але аб’ект яшчэ не здадзены ў эксплуатацыю, бо неабходна выканаць частку агульнабудаўнічых работ. Але людзей хвалюе іншае. “Чаму непрыемныя пахі час ад часу разносяцца на далёкай адлегласці. У чым справа?” — цікавяцца яны. Пытанні мы пераадрасавалі галоўнаму інжынеру прадпрыемства Георгію Пятровічу Касцяню. Вось што ён паведаміў:

— Што праблема ёсць, мы прызнаём і ўсяляк імкнёмся яе вырашыць. На заводзе распрацаваны комплекс  мерапрыемстваў. Так, у маі звярнулі­ся да праекціроўшчыкаў з просьбай выканаць карэкціроўку праектных работ з мэтай перакрыцця аднаго з рэзервуараў, дзе знаходзіцца адпрацаваны шлам. У ліпені праект быў гатовы. Заказалі сэндвіч-панэлі, неабходныя металаканструкцыі і ўжо ў канцы месяца рэзервуар перакрылі. Цяпер яго ўшчыльняем: ён павінен быць герметычны. Дадаткова робім люк (на гэтым тыдні будзе гатовы), каб пры вытворчай неабходнасці ў рэзервуар можна было спусціцца і прарэвізаваць яго.

Пытанне пахаў у нас пастаянна на парадку дня, і мы яго задалі прадстаўнікам польскай фірмы WEGLO STAL, якая пастаўляе розныя кампаненты для ачысткі сцёкавых вод. Яны парэкамендавалі зрабіць фільтр, які б ачышчаў паветра, і мы яго зробім. А калі гэтыя мерапрыемствы не дадуць належнага эфекту, звернемся да праекціроўшчыкаў і папросім зрабіць яшчэ адзін праект на перакрыццё другога рэзервуару і ўстаноўкі дадатковых фільтруючых элементаў.

Часам можна пачуць, маўляў, у ачышчальных збудаваннях штосьці зроблена няправільна, таму і застаюцца пахі. Наконт гэтага скажу наступнае. Першапачаткова, калі ачышчальныя збудаванні праектаваліся, мы цікавіліся ў распрацоўшчыкаў, выканаўцаў абсталявання, ці не будзе пахаў. Яны сцвярджалі, што не будзе. А што датычыць чыстай вады, якую на выхадзе абяцалі італьянцы, дык яно так і ёсць. Маем афіцыйны пратакол выпрабавання сцёкавых вод: атрымана чыстая вада, якая па сваіх параметрах не горшая за водаправодную. Рабілі яе аналізы ў лабараторыі УП ЖКГ: вада з нашых ачышчальных збудаванняў на выхадзе набліжаецца да дыстыляванай.

Дарэчы, з красавіка па чэрвень на заводскіх ачышчальных збудаваннях працавалі спецыялісты кафедры біятэхналогіі Беларускага дзяржаўнага тэхналагічнага ўніверсітэта. Яны вывучалі работу збудаванняў, у тым ліку і праблему існуючых пахаў. Далі рэкамендацыі, і мы іх выконваем. Як бачыце, ідзём паступова, магчыма, дробнымі крокамі, але неадступна. Асабіста ў мяне дзень і пачынаецца, і завяршаецца на ачышчальных. Я пастаянна цікаўлюся, як абстаяць справы на іншых прадпрыемствах. У прыватнасці, нядаўна быў на Шчучынскім сыраробным заводзе, дзе ўстаноўлены прыкладна такія ачышчальныя збудаванні. Шлам у іх першапачаткова захоўваўся ў закрытых ёмістасцях, пах ёсць толькі ў памяшканні, на вуліцу практычна не выходзіць, а самі ачышчальныя збудаванні знаходзяцца на тэрыторыі прадпрыемства. І гэта надае ўпэўненасці, што намі ўзяты правільны кірунак, і што работы, якія вядзём зараз, усё-такі дадуць станоўчы эфект. Трэба адзначыць, што паху дадаюць і старыя біясажалкі, якія плануем пачысціць гэтай зімой. У бліжэйшы час наведаю яшчэ Бярозаўскі сыраробны завод — там таксама ёсць аналагічныя нашым ачы­шчальныя збудаванні. І апошняе. Мы закупілі трактар з бочкай і вывозім шлам на глеевыя пляцоўкі, каб ён як мага менш часу ўтрымліваўся ў рэзервуары.

Адным словам, пастаянна імкнёмся зменшыць негатыўнае ўздзеянне пахаў на тэрыторыі, якія знаходзяцца паблізу ачышчальных збудаванняў. Дарэчы, на гэтых вуліцах пражывае значная частка работнікаў прадпрыемства.

Запісала Галіна ПІШЧ.