Дзе тонка, там і рвецца

“ПМЦ-Паставы” — ФК “Лепель” — 4:6

У адрозненне ад пастаўчан ФК “Лепель” у перыяд міжсезоння  сур’ёзна ўзмацніўся за кошт ігракоў з Новалукомля, загуляных у чэмпіянаце Беларусі па міні-футболе, і з наваполацкага “Нафтана”, якія цяпер служаць у лепельскім гарнізоне. А вось у гаспадароў зноў узніклі кадравыя праблемы з-за адсутнасці па розных прычынах двух асноўных футбалістаў. А ў вопытнага цэнтральнага абаронцы А. Жарскага ўжо на 10-й хвіліне абвастрылася леташняя траўма нагі, і ён не змог прадоўжыць гульню. Госці скарысталіся гэтым і правялі дзве выніковыя імклівыя контратакі.

З такім развіццём падзей наша каманда не пагадзілася, і на 32-й хвіліне апорны паўабаронца Руслан Зелянкевіч ударам у абыход сценкі са штрафнога па-майстэрску правёў прыгожы гол. Аднак госці неў­забаве зноў скарысталіся памылкай абароны ПМЦ, і Дзяніс  Бортка без перашкод правёў свой другі мяч. Пасля гэтага на цудоўным газоне стадыёна мэблевага цэнтра пайшоў адкрыты футбол, а гледачы ўзрадаваліся, калі пастаўчане разыгралі адпрацаваную камбінацыю і Арцём Цітовіч уварваўся ў штрафную, абыграў апекуна і моцна стрэліў у далёкі вугал — 2:3.

Праўда, абноўленая лінія абароны гаспадароў не паспявала за хуткімі перамяшчэннямі саперніка і перад свістком на перапынак зноў дазволіла вызначыцца нападаючаму лепяльчан Сяргею Носіку. У другой палове сустрэчы каманды прадоўжылі абмен ударамі, і пастаўчане ледзь не пераламалі ход няўдалага дагэтуль матча. Яны зноў правялі небяспечную фланговую атаку, якую завяршыў цэнтрфорвард ПМЦ Раман Мядзве­дзеў. Затым А. Цітовіч мог зраўняць лік, але яму не ўдалося перайграць вопытнага варатара, капітана гасцей. На ход барацьбы, на жаль, неўзабаве паўплывала памылка су­дзейскай брыгады, калі свой пяты гол у матчы госці правялі са становішча “па-за гульнёй”.

Засмучаныя пастаўчане ў канцоўцы таксама зноў памыліліся і яшчэ раз прапусцілі мяч, калі няўдала паспрабавалі стварыць штучны афсайд. Да гонару пастаўчан, яны змагаліся да канца, хоць выратаваць лёс матча было ўжо немагчыма. На апошніх хвілінах рашуча пайшоў наперад абаронца ПМЦ Віталь Дубін і завяршыў трапным ударам камбінацыю сваіх таварышаў. Калі б не слабая гульня ў задняй лініі, то вынік сустрэчы з моцным сапернікам мог бы быць станоўчым. Нягле­дзячы на асечку, гледачы апладысментамі право­дзілі з поля Прыходзьку (Казараўца), Місніка, Дубіна, Жылевіча (Амбразевіча), Жарскага (Павініча), Голубева (Лысёнка), Якаўлева (Лубко), Карагу (к), Зелянкевіча, Мядзведзева (Чавусава), Цітовіча (Шурко).

У гэтым туры лідар — “Полацкгаз” — страціў два ачкі на сваім полі, дзе згуляў унічыю з лікам 2:2 з глыбачанамі. У Верхня­дзвінску мясцовая “Дзвіна-Барс” з лікам 3:1 перамагла докшыцкі “Ветразь”, а сустрэча каманд Шаркаўшчыны і Міёр была перанесена. У наступным туры пастаўскія футбалісты ў суботу, 27 чэрвеня, пазмагаюцца на выездзе з міёрцамі.

Уладзімір ШЫК.