«Танцавальны мікс»: калектывы ранейшыя, нумары — новыя (+фота)

Чарговы раённы фестываль-агляд харэаграфічнага мастацтва “Танцавальны мікс”, які 19 мая праходзіў у раённым Доме культуры па вуліцы Станкевіча, сабраў нямала гледачоў. Падтрымаць юных выканаўцаў прыйшлі сябры, знаёмыя, бацькі, многія гараджане, якія захапляюцца выступленнямі танцавальных калектываў. Тыя апраўдалі надзеі прысутных.

Парадаваліся і члены журы: намеснік начальніка аддзела ідэалагічнай работы, культуры і па справах моладзі райвыканкама Ірына Лойка, намеснік начальніка аддзела адукацыі, спорту і турызму райвыканкама Таццяна Русалоўская, дырэктар РДК Ала Чарнюк, выкладчыца Пастаўскай дзіцячай школы мастацтваў Наталля Сіўко і аўтар гэтых радкоў, бо амаль усе калектывы, якія выходзілі на сцэну ў папярэднія гады, сёлета выступілі  пераважна з новымі нумарамі, у новых касцюмах, з новымі рэквізітамі.

Выбар быў вялікі. Канкурсантам трох узроставых груп прапаноўваліся наступныя намінацыі танцаў: класічны, эстрадны, народны, усходні, бальны, сюжэтны, сучаснай харэаграфіі. Перавагу ўдзельнікі фестывалю аддалі    нумарам з сучаснай, арыгінальнай харэаграфіяй. Кіраўнікам большасці калектываў удалося рэалізаваць свае творчыя знаходкі, мовай танцавальнага мастацтва перадаць самыя розныя пачуцці чалавека, стварыць на сцэне міні-спектаклі.

Перш за ўсё гэта датычыць Валянціны Бахановіч і яе 6-9 і 10-12-гадовых выхаванцаў з раённага цэнтра дзяцей і моладзі. Непасрэднасць, выразнасць, добрая тэхніка — такую  характарыстыку і вышэйшую ацэнку атрымалі выканаўцы танцаў “Вальс кветак” і “Беларусь мая”  харэаграфічнага калектыву “Непаседы”.  Зачаравалі гледачоў і журы дзяўчынкі старэйшага ўзросту танцавальнага калектыву “Хамелеон” Дунілавіцкай ЯС-СШ.  Іх “Кармэн сеньёрыта” ў пастаноўцы Фарыды Дуб  па мастацкім афармленні нумара, узроўні артыстызму і тэхніцы выканання пераўзышла ўсе іншыя танцы выканаўцаў ва ўзросце да 16 гадоў. Вышэйназваныя калектывы сталі пераможцамі фестывалю-агляду.

Самых добрых слоў заслугоўваюць юныя танцоры, якія занялі   другое і трэцяе месцы. У іх ліку танцавальныя калектывы “Хамелеон” малодшай і змешанай  груп, “Скай-дэнс” трох узроставых груп раённага цэнтра дзяцей і моладзі, “Амбішнс” Пастаўскай гімназіі, ансамблі танца “Рытм” і “Дзяцінства” Навасёлкаўскага філіяла Варапаеўскай дзіцячай школы мастацтваў. Пра незвычайнасць і непаўторнасць выкананых імі нумароў сведчаць ужо самі  назвы танцаў: “Дзіцячае танга”, “Мы любім Еўрабачанне”, “Ляці, пярынка”, “Патанцуй са мной”, “Рэйп”, “Птушкі”, “Уверх у неба” і іншыя. Каб увасобіць на сцэне ўсё задуманае, шмат давялося папрацаваць кіраўнікам  ансамбляў Юліі Петуховай, Алене Салавей, Вераніцы Меліхавец. Паспяховае выступленне  не стала  нечаканасцю, бо многія з названых калектываў даўно выступаюць не толькі на дзіцячых мерапрыемствах, але і на раённых святах. Станоўчым з’яўляецца тое, што калектывы прыбаўляюць у майстэрстве, пастаянна папаўняюць рады ўдзельнікаў. Справа гэта няпростая, асабліва для тых устаноў адукацыі і культуры, дзе няма прафесійных спецыялістаў.

Пакуль нясмела, але на нядрэнным выканальніцкім узроўні заявілі пра сябе на конкурсе  вучні СШ №2 г. Паставы, танцавальныя калектывы РДК, Варапаеўскага ГПДК.

Узнагародай для пераможцаў і прызёраў раённага фестывалю-агляду харэаграфічнага мастацтва “Танцавальны мікс” сталі дружныя апладысменты гледачоў і памятныя Дыпломы аддзела ідэалагічнай работы, культуры і па справах моладзі райвыканкама. Лепшыя з іх пастаўчане змогуць убачыць на розных мерапрыемствах, якія праводзяцца ў горадзе.

Тэкст і фота  Пятра КУРЫЛОВІЧА.