Малады прафесіянал

Начальнік змены №3 пажарнай аварыйна-выратавальнай часці №1 старшы лейтэнант унутранай службы Андрэй Турок.

У снежні 2014 года 16 ваеннаслужачых унутранай службы Пастаўскага РАНС за мужнасць і гераізм, праяўленыя пры выкананні службовага абавязку, былі адзначаны грашовымі прэміямі Міністэрства па надзвычайных сітуацыях Рэспублікі Беларусь. З рук начальніка Віцебскага абласнога ўпраўлення МНС В. І. Чэкана іх атрымалі П. П. Латыш, Я. Г. Крэміс, Я. Р. Кундро, А. А. Мозалеў, С. А. Мінгіновіч, А. А. Каравацкі, А. У. Турок, В. А. Сеганкевіч, Я. Б. Хмяльніцкі, А. В. Гінько, У. У. Лелякоў, І. І. Будзіч, С. А. Гарошка, І. У. Багрудэнка, Ю. С. Шаўчук і С. А. Кадушкевіч. Акрамя таго, В. А. Сеганкевіч і Г. Р. Пяткоўскі ўзнагароджаны медалямі “За бездакорную службу”, а Г. М. Макоўскі — медалём “За адзнаку”.

Адзін з самых маладых сярод тых, каму ўручылі прэмію, — начальнік змены №3 пажарнай аварыйна-выратавальнай часці №1 старшы лейтэнант унутранай службы Андрэй Турок. У Пастаўскім РАНС ён служыць крыху больш за тры гады, на працягу якіх выдатна зарэкамендаваў сябе. Па словах намесніка начальніка аддзела па ідэалагічнай рабоце і кадравым забеспячэнні І. І. Януковіча, Андрэй — энергічны, граматны работнік і кіраўнік, якога паважаюць падначаленыя, сапраўдны прафесіянал у сваёй справе.

Стаць ратаўніком хлопец марыў з дзяцінства.

— Заўсёды любіў рызыку, небяспеку, вышыню, — расказваў ён. — У школе — а я родам з Браслаўскага раёна — займаўся альпінізмам, рознымі відамі спорту, быў фізічна развітым. Але жаданне звязаць свае захапленні з прафесіяй з’явілася пазней. Калі вучыўся ў 6 класе, у школьнай спартыўнай зале здарыўся пажар. На яго ліквідацыю прыбыло падраздзяленне мясцовага РАНС. Дзеянні пажарных настолькі ўразілі мяне, што цвёрда вырашыў: буду ратаўніком. Атрымаўшы атэстат аб сярэдняй адукацыі, паступіў у Гомельскі інжынерны інстытут МНС. Пасля яго заканчэння па размеркаванні трапіў у Паставы: тут прапанавалі пасаду начальніка змены.

За гады службы разам з асабовым складам А. Турок не раз выязджаў на тушэнне пажараў, ліквідацыю іншых надзвычайных сітуацый. Не раз рызыкаваў жыццём, ратуючы жыцці іншых людзей, прыватную або дзяржаўную маёмасць. Так, у сакавіку мінулага года ў Соўках яго змена выцягнула з ахопленага полымем дома пенсіянерку. Напрыканцы 2014-га першай уступіла ў барацьбу з вогненнай стыхіяй на льнозаводзе. Тады дзякуючы смелым і рашучым дзеянням Андрэя і іншых ратаўнікоў пажар удалося лікві­даваць у заспетых памерах і з найменшымі эканамічнымі стратамі.

У падпарадкаванні маладога кіраўніка ёсць вопытныя ратаўнікі, якія адслужылі ў РАНС па 15-20 гадоў. Як прызнаецца Андрэй, прыйшоўшы ў аддзел, спачатку ён вучыўся ў іх тонкасцям прафесіі, імкнуўся на практыцы авалодаць усім, што ўмеюць старэйшыя таварышы. Цяпер жа сам вучыць маладых, з’яўляецца настаўнікам для двух стажораў у сваёй змене. Адзін з іх пасля заканчэння стажыроўкі будзе праходзіць службу тут жа на пасадзе хіміка-дазіметрыста, другі, вадзіцель, адправіцца на пост у в. Парыж.

Атрыманая прэмія стала для А. Турка першай службовай узнагародай. І можна не сумнявацца: наперадзе ў мэтанакіраванага, са здаровымі амбіцыямі хлопца і кар’ерны рост у органах МНС, і новыя ўзнагароды.

Алена ШАПАВАЛАВА.

Фота аўтара.