«Снежная каралева» захапіла дзяцей і дарослых (+ ФОТА)

25 і 27 снежня ў Доме культуры па вуліцы Станкевіча адбылася прэм’ера навагодняй казкі “Снежная каралева”. Музычнае шоу, на  прадстаўленнях якога пабывала тысяча дзяцей і дарослых,  стала самым масавым з усіх святочных мерапрыемстваў, якія ў навагоднія дні прайшлі ў райцэнтры.

У аснову спектакля пакладзена сусветна вядомая казка Андэрсэна, сюжэт якой многія памятаюць з дзяцінства. Але дзякуючы творчаму падыходу мастацкага кіраўніка Дома культуры Алены Слядзеўскай яна набыла новае гучанне. Гледачы, то затаіўшы дыханне, то даючы волю эмоцыям, сачылі не толькі за прыгодамі самаадданай Герды і іншых персанажаў, але і разам з імі па меры развіцця па­дзей траплялі ў свет прыгажосці і загадкавасці, захапляліся талентамі юных выканаўцаў.

У прадстаўленні задзейнічана шмат дзяцей, а ўсяго — каля 90 выканаўцаў. Уладарнай і ледзяной паўстала Снежная каралева (Алена Слядзеўская). У гэтай ролі яна раскрыла новыя рысы свайго таленту і прафесіяналізм, ігрой захапіла гледачоў. Пяшчотай, дабрынёй і спагадай паланілі Герда (Лера Яфімава) і Кай (Жэня Васілевіч). Ды і трымаліся яны на сцэне як сапраўдныя артысты. Запомніліся гледачам Прынцэса (Маша Дунец), Прынц (Жэня Вайцяхоўскі), Казачнік (Яўгеній Каралёў), Атаманша (Наталля Яфімава), выканаўцы іншых роляў — артысты народнага лялечнага тэатра “Вытварашкі” Алеся Глазко, Таццяна Кухальская, Іна Гарачкіна.

Некалькі арыгінальных харэаграфічных нумароў выканалі ўдзельнікі танцавальнага калектыву і аркестра барабаншчыц пастаўскай дзіцячай школы мастацтваў, узорнай цыркавой студыі “Каскад”. Вельмі спадабаліся выступленні юных спявачак Алесі Жаўновай і Машы Лібоза ў суправаджэнні танцавальных калектываў гімназіі і Навасёлкаўскага філіяла Варапаеўскай школы мастацтваў. За гэта трэба дзякаваць кіраўнікам калектываў Наталлі Сіўко, Алене Салавей, Анастасіі Логінавай, Вераніцы Меліхавец. Спадабаўся гледачам і сюрпрыз — дрэсіраваныя сабачкі — ад цырка “Алімпія” з Мінска.

Паўтары гадзіны праляцелі як адно імгненне. Прадстаўленне атрымалася маляўнічым, музычным, высокапрафесійным. Гісторыя вернасці, любові і дружбы ў выкананні самадзейных артыстаў аднолькава кранула і дарослых, і дзяцей.

— Пастаўскіх гледачоў вельмі цяжка здзівіць, бо яны пастаянна кантактуюць з зоркамі беларускай, а ў апошні час і расійскай эстрады, — гаварыла дырэктар ДК Ала Чарнюк. — Тым не менш напаўняльнасць залы, шчырыя водгукі гледачоў сведчаць пра асаблівую каштоўнасць пераднавагодніх сустрэч, якая сёлета прайшла ў чацвёрты раз. Людзі чакаюць казачных прыгод і здарэнняў, прыходзяць у Дом культуры як на свята. Мы ў сваю чаргу вельмі адказна падыходзім да падбору рэпертуару, выканаўцаў, больш увагі пачалі надаваць афармленню дэкарацый, тэхнічнаму аснашчэнню сцэны і дзей, якія на ёй адбываюцца. Вось і на гэтым прадстаўленні побач з лазернай устаноўкай, эфектным рознакаляровым святлом былі задзейнічаны новая снегавая машына, іншае сцэнічнае абсталяванне. Карыстаючыся выпадкам, хачу падзякаваць усім удзельнікам спектакля за творчасць, карпатлівую працу, а таксама бацькам дзяцей-артыстаў, якія аказалі дапамогу ў стварэнні казачнага навагодняга падарунка.

Тэкст і фота Пятра КУРЫЛОВІЧА.