Да навагодніх свят гатовы! (+фота)

Напрыканцы мінулага тыдня на цэнтральнай плошчы райцэнтра з’явіўся галоўны сімвал Новага года — прыгажуня ёлка. Народныя гулянні ля яе будуць працягвацца амаль месяц і падораць пастаўчанам і гасцям нашага горада прыўзняты святочны настрой. Старт ім быў да­дзены 15 снежня — на плошчы прайшло мерапрыемства “Ёлка, зіхаці агнямі, карагодзьце разам з намі!”.

Яно пачалося з яркага тэатралізаванага шэсця галоўных герояў свята — работні­каў сельскіх клубных устаноў раёна. Пераўвасобіўшыся ў Дзедаў Марозаў, Снягурак і шматлікіх іншых персанажаў, яны прайшліся ад канцэртнай залы па вуліцы Чырвонаармейскай да цэнтра горада, дзе і разгарнулася святочная дзея.

Больш за дзве гадзіны на сцэне выступалі творчыя калектывы з Варапаева, Лынтуп, Ваўкоў, Гуты, Дунілавіч, Камай, Кураполля, Парыжа, Ляхаўшчыны і Юнек. Хоць усе забаўляльныя праграмы былі аб’яднаны каляднай і навагодняй тэматыкай, кожная група артыстаў знайшла чым здзівіць гледачоў. Усяму было месца — песням, танцам, вершам, сцэнкам, жартам, гульням з гледачамі. А іх у той дзень сабралася нямала, асабліва маленькіх пастаўчан, якіх шматлікімі конкурсамі і гульнямі таксама забаўлялі работнікі раённага цэнтра дзяцей і моладзі.

Арганізатары мерапрыемства прызналіся, што яно ладзілася ў першую чаргу з мэтай парадаваць, павесяліць пастаўчан, а не вызначыць пераможцу сярод калектываў. Тым не менш ніхто не застаўся без падарункаў, якія культработнікам уручылі намеснік старшыні райвыканкама Юрый Мікалаевіч Кісялёў і начальнік аддзела ідэалагічнай работы, культуры і па справах моладзі Галіна Мікалаеўна Чаплінская. Самадзейным артыстам з варапаеўскага і лынтупскага пасялковых Дамоў культуры ўручаны новыя святломузычныя ўстаноўкі, прадстаўнікі Гуты ў якасці прэзента атрымалі навагоднія касцюмы Снягуркі і Дзеда Мароза, а парыжане ўзнагароджаны музычным цэнтрам. Усе астатнія заахвочаны салодкімі пачастункамі.

Як адзначыў падчас свайго выступлення Ю. М. Кісялёў, свята стала своеасаблівым аглядам самадзейных калектываў і пацвердзіла іх гатоўнасць да правядзення шматлікіх навагодніх мерапрыемстваў.

Напрыканцы дзеі на галоўнай ёлцы раёна была запалена рознакаляровая гірлянда, ля зялёнай прыгажуні закружыў першы масавы карагод. Іх наперадзе дзясяткі…

Іна СНЯЖКОВА. Фота Пятра КУРЫЛОВІЧА.