Гінуць людзі ў агні

Толькі за адны суткі, з 11 на 12 снежня, у рэспубліцы адбыліся 24 надзвычайныя сітуацыі. На пажарах загінулі 12 чалавек, 4 траўміраваны, пашкоджана 16 пабудоў. 

Так, ноччу 11 снежня ў жылым доме ў вёсцы Праскурні Жлобінскага раёна Гомельскай вобласці ў агні загінулі родны і стрыечны браты гаспадара, а таксама грама­­дз­я­нін, які знаходзіўся ў гасцях, — усе непрацуючыя. Мяркуемая прычына пажару — неасцярожнасць пры курэнні. Каля 7 гадзін раніцы загарэлася кватэра ў аднапавярховым жылым доме па вуліцы Лермантава ў Глыбокім. У ёй загінуў гаспадар 1947 года нараджэння. У 14.49 стала вядома аб пажары ў жылым доме па вуліцы Літвінава ў Полацку, які належыць 63-гадовай пенсіянерцы. Там загінуў 68-гадовы грамадзянін. Пажар у адным з прыватных дамоў у Гарадку забраў жыцці гаспадара 1949 года нараджэння і яго 57-гадовай жонкі. Ва ўсіх трох выпадках прычыны пажараў устанаўліваюцца.

Усяго ж з пачатку года ў рэспубліцы адбыўся 6431 пажар, загінуў 731 чалавек, у тым ліку 18 дзяцей. У Віцебскай вобласці адбылося 992 пажары, на якіх загінулі 133 чалавекі, з іх 1 дзіця. У Пастаўскім раёне зарэгістраваны 38 пажараў, 2 чалавекі загінулі. Асноўнай прычынай пажараў, гібелі і траўматызму людзей на іх па-ранейшаму застаецца неасцярожнае абыходжанне з агнём пры курэнні, у большасці выпадкаў — у нецвярозым стане. Асобы, якія злоўжываюць спіртнымі напіткамі, ставяць пад пагрозу не толькі ўласную бяспеку, але і жыццё людзей, якія пражываюць па суседстве. Таму будзьце пільнымі ў адносінах да дадзенай катэгорыі грамадзян, паведамляйце пра іх у РАНС або міліцыю. У Пастаўскім раённым аддзеле па надзвычайных сітуацыях кругласутачна працуе тэлефон даверу, яго нумар 4-15-01. Выклікаць экстранныя службы можна таксама па тэлефонах 101 і 112.

А. МУХЛЯ,

інспектар групы навучання і прапаганды РАНС.