І Зюзя будзе

11 снежня ў Беларусі стартавала навагодняя дабрачынная акцыя “Нашы дзеці”.

Па традыцыі падчас яе правядзення кіраўнікі рэспубліканскіх органаў дзяржаўнага кіравання, мясцовых выканаўчых і распарадчых органаў, канцэрнаў, банкаў, грамадскіх аб’яднанняў наведаюць дзіцячыя інтэрнатныя ўстановы, апякунскія і прыёмныя сем’і, дзіцячыя дамы сямейнага тыпу, сем’і, якія выхоўваюць дзяцей-інвалідаў, цэнтры карэкцыйна-развіваючага навучання і рэабілітацыі, дзіцячыя бальніцы, каб павіншаваць хлопчыкаў і дзяўчынак з Новым годам і Раством, уручыць ім падарункі. Усяго плануецца ахапіць увагай больш за 15 тысяч дзяцей.

Цэнтральнай падзеяй акцыі стане навагодняе свята ў Палацы Рэспублікі. На яго будуць запрошаны больш за 2 тысячы 300 дзяцей ва ўзросце ад 8 да 14 гадоў з усіх рэгіёнаў краіны: пераможцы алімпіяд, творчых конкурсаў і спартыўных спаборніцтваў, лідары дзіцячых грамадскіх аб’яднанняў і арганізацый, дзеці-сіроты, дзеці, якія засталіся без апекі бацькоў, інваліды, са шматдзетных і малазабяспечаных ­сем’яў.

У рамках акцыі — а яна прадоўжыцца да 10 студзеня — запланаваны шэраг мерапрыемстваў і на Пастаўшчыне. Сярод іх дабрачынныя ёлкі, святочныя ёлкі і дыскатэкі ў школах, наведванне кіраўніцтвам раёна сацыяльна-педагагічнага цэнтра і цэнтра карэкцыйна-развіваючага навучання і рэабілітацыі ў Паставах з віншаваннямі і падарункамі іх выхаванцам, навагоднія прадстаўленні для вучняў школ у Зюзі Паазерскага. Прадстаўленні ў Азёрках адбудуцца 25, 27, 28, 29 снежня і 6 студзеня. Пачатак у 15.00. Калі будуць яшчэ заяўкі ад груп жадаючых пабываць ва ўладаннях пастаўскага Дзеда Мароза, магчыма правя­дзенне дадатковых прадстаўленняў у гэтыя ж дні ў 17.00.

Мяркуецца, што ўдзел у акцыі прымуць таксама дзяржаўныя і прыватныя прадпрыемствы раёна. Напярэдадні райвыканкам звярнуўся да іх кіраўнікоў з просьбай аказаць дапамогу ў набыцці спартыўнага інвентару і новага абсталявання для школ.

Алена ШАПАВАЛАВА.