Шоу першакласнікаў (+фота)

Так называлася яркае, лёгкае, феерычнае мерапрыемства раённага Дома культуры, якое ўпершыню прайшло ў нашым горадзе напрыканцы лістапада.

Новае, не падобнае на іншыя,  шоу сабрала ў якасці ўдзельнікаў тых, каго яшчэ ўчора мы называлі малышамі, а сёння яны з гордасцю носяць званне вучняў, пачынаючы доўгае падарожжа ў краіну ведаў. А таксама шматлікіх гледачоў, сярод якіх былі не толькі бацькі, бабулі і дзядулі канкурсантаў, але і іх настаўнікі, аднакласнікі, проста знаёмыя і незнаёмыя пастаўчане. З плакатамі і цудоўным настроем тым ня­дзельным днём яны прыйшлі падтрымаць першакласнікаў і незалежна ад журы вызначыць для сябе лепшага з лепшых. Ну, а прафесійна “журылі” ўдзельнікаў намеснік началь­ніка аддзела адукацыі, спорту і турызму райвыканкама Н. У. Есьман, дырэктар РДК А. Б. Чарнюк, выкладчыца Пастаўскай дзіцячай школы мастацтваў імя А. Тызенгаўза Ж. В. Гучык і аўтар гэтых радкоў.

Пачалося шоу са знаёмства з канкурсантамі. Большасць з іх упершыню выйшлі на такую вялікую сцэну. Тым не менш трымаліся ўпэўнена, разумеючы, што за плячыма ў кожнага цэлая школа, якую яны прадстаўляюць. Гонар СШ №1 выпала адстойваць Вікторыі Бабіч. СШ №2 “дэлегавала” Артура Кліпу. Ад трэцяй гарадской школы выступала Карына Шубелька. А СШ №4 і №5 прадстаўлялі адпаведна Маша Шаура і Аліна Дзіковіч.

Якія яны, першакласнікі? Пра  што мараць? Чым захапляюцца? Адказы на гэтыя пытанні даў першы конкурс “Візітка”. У ім удзельнікі ў вершах і прозе расказвалі пра сябе і свае сем’і. А дапамагалі ім у такой няпростай справе мамы і таты, брацікі, сястрычкі, цёці, дзядзі, сябры, настаўнікі.

Тое, што ўсе канкурсанты — асобы таленавітыя, стала зразумела ўжо пасля іх самапрэзентацыі. Яшчэ больш пераканала ў гэтым наступнае выпрабаванне “Мінута славы”. “Вось каго трэба адпраўляць ад Беларусі на “Еўрабачанне!” — падумалі, напэўна, многія прысутныя ў зале, гарачымі апладысментамі сустракаючы і праводзячы маленькіх артыстаў. Чацвёра з іх паўсталі перад гледачамі як спевакі, а пятая ўдзельніца — Карына Шубелька —выканала разам з ся­броўкамі самабытны цыган­скі танец.

“Прымераць” на сябе вобраз вядомага артыста або героя папулярнага мультыплікацыйнага фільма ўдзельнікі змаглі ў апошнім конкусе, які так і называўся — “Зорны вобраз”. Падчас яго на сцэну выйшлі самая экстравагантная спявачка расійскага шоу-бізнесу Ёлка, удзельніцы мінулагодняга “Еўрабачання” “Буранаўскія бабулі”, героі любімых мно­гімі пакаленнямі мультфільмаў “Ну, пачакай!” — Заяц і Воўк, а таксама “Ма­ша і мядзведзь” — Машачка і яе касалапы сябар.

Няпростая задача паўстала перад журы пасля завяршэння шоу: як выбраць сярод пяці музыкальных і артыстычных перша­клашак аднаго самага-самага? Таму было прынята рашэнне ўзнагародзіць усіх, прысвоіўшы кожнаму свой тытул. Такім чынам, звання “Міс Зачараванне” ўдастоена Аліна Дзіковіч. “Міс Артыстызм” стала Маша Шаура. Карына Шубелька прызнана “Міс Арыгінальнасць”. Самая маленькая ўдзельніца Віка Бабіч названа “Міс Непасрэднасць”. А адзінаму ў дзявочым “кветніку” мужчыну Артуру Кліпу прысвоена званне “Містар Смеласць”. Разам з дыпломамі канкурсанты атрымалі ў падарунак тарты і безліч апладысментаў ад сваіх балельшчыкаў.

Алена ШАПАВАЛАВА.

Фота аўтара.