«Мы ўсё можам»

Пад такой назвай у Міжнародны дзень інвалідаў у Доме культуры па вуліцы Станкевіча ў райцэнтры прайшла акцыя міласэрнасці. Удзел у ёй прынялі ўсе неабыякавыя да праблем людзей з абмежаванымі магчымасцямі. Мерапрыемства атрымалася кранальным і па-сямейнаму ўтульным.

За гадзіну да асноўнай дзеі ў фае Дома культуры пачала працаваць грамадская прыёмная. Усе жадаючыя маглі атрымаць кансультацыю ўрача, юрыста, псіхолага, спецыяліста ўпраўлення па працы, занятасці і сацыяльнай абароне райвыканкама, старшыні раённай арганізацыі Беларускага таварыства Чырвонага Крыжа. Паслугі спецыялістаў былі настолькі запатрабаванымі, што да кожнага з іх выстройвалася невялікая чарга. Таксама ў фае была арганізавана выстава работ тых, хто пражывае ў Дунілавіцкім псіханеўралагічным доме-інтэрнаце.

Канцэрт адкрыла выступленне народнага хору ветэранаў вайны і працы. Творчую эстафету ў іх перанялі ўдзельнікі мастацкай самадзейнасці Тамара Маслоўская і Станіслаў Кішко. Большасць жа канцэртных нумароў падрыхтавалі насельнікі Дунілавіцкага псіханеўралагічнага дома-інтэрната (дырэктар П. І. Паўловіч), выхаванцы аддзялення сацыяльнай адаптацыі, рэабілітацыі і дзённага знаходжання інвалідаў і сям’я Пачкоўскіх. Канцэрт атрымаўся яр­кім, кранальным і запамінальным. Душэўныя вершы, папулярныя пес­ні і запальныя танцы гледачам дарылі Жанна Козел, Ігар Хвянько, Алеся Мялко, Наталля Бурэева, Вольга Фамінова, Віктар Муха, Вікторыя Плотнікава, Аляксандр Баглікаў, Марыя Новікава, Вольга Гуль, Аляксандр Валасевіч, Наталля Сяргейчык і Андрэй Дзівін.

Тое, што людзі з абмежаванымі магчымасцямі, бясспрэчна, з’яўляюцца таленавітымі і пастаянна гатовы дзяліцца сваёй творчасцю, дабрынёй і любоўю з усімі, падкрэсліў у сваім прывітальным слове намеснік старшыні райвыканкама Юрый Мікалаевіч Кісялёў. Ён выказаў ім сардэчныя словы па­дзякі за аптымізм і б­а­дзёрасць духу, якія, нягледзячы на цяжкасці, яны не страцілі, а наадварот, поўныя энергіі і жывуць паўнавартасна. Жыццярадаснасці і мэтанакіраванасці многіх з іх могуць пазайздросціць і здаровыя людзі.

У якасці ганаровых гасцей на мерапрыемстве прысутнічалі Галіна Мікалаеўна Чаплінская, старшыня раённага аддзялення грамадскага аб’яднання «Беларускі фонд міру», і Таццяна Уладзіміраўна Туманава, старшыня Ві­цеб­скага абласнога аддзялення грамадскага аб’яднання «Беларускі фонд міру». Т. У. Туманава расказала пра тыя асноўныя праекты, над якімі працуе фонд, пра пачуцці і ўспаміны, якія звязваюць з нашым горадам, пра тое, што цывілізаванае грамадства абавязана звяртаць увагу на праблемы інвалідаў, заўсёды падтрымліваць іх. У пацвярджэнне сваіх слоў Таццяна Уладзіміраўна ўручыла дырэктару тэрытарыяльнага цэнтра сацыяльнага абслугоўвання насельніцтва Дзіяне Іванаўне Пякарскай пашпарты ад дзвюх швейных машын.

Спонсарская дапамога Пастаўскаму тэрытарыяльнаму цэнтру аказваецца не толькі ў святы. У рамках дабрачыннай акцыі за год на рахунак установа пералічана 60 мільёнаў беларускіх рублёў, набыты камп’ютарная і кухонна-бытавая тэхніка, іншыя неабходныя рэчы. Асноўныя спонсары — В. Я. Бабічава, Ф. М. Савіч, Т. У. Туманава, А. І. Малец, Р. А. Леўкавец, У. М. Чакавы, А. А. Мацяюн, С. В. Маскалёў, С. А. Анісімаў, кіраўніцтва сацыяльнай службы раёна і іншыя. Многія з гэтых людзей прысутнічалі на мерапрыемстве ў якасці ганаровых гасцей.

Скончылася акцыя «Мы ўсё можам» сюрпрызам — падчас фінальнай песні на сцэну вынеслі велізарны торт. Спонсарамі гэтага ласунка, а таксама салодкага стала, які быў накрыты ў фае Дома культуры для ўсіх прысутных, сталі ПГУП «Н. Алёшка», ЗАТ«Дабраном»,  ААТ «Малочны завод», ПУП «Кабяк Я. У.», індывідуальныя прадпрымальнікі М. М. Мятасава, А. П. Дзяхцяр, Л. А. Матвеева, Т. В. Клімюк.

Вераніка ФІЛАНОВІЧ. Фота аўтара.