Акцыя «Падзяліся цяплом душы сваёй» працягваецца

1 кастрычніка бягучага года па ініцыятыве аддзела адукацыі, спорту і турызму раённага выканаўчага камітэта сацыяльна-педагагічным цэнтрам была аб’яўлена дабрачынная акцыя па зборы цёплага адзення і абутку для шматдзетных і малазабяспечаных сем’яў «Падзяліся цяплом душы сваёй». У ёй прынялі ўдзел 50 жыхароў горада і раёна, 6 устаноў адукацыі (цэнтр карэкцыйнага развіцця і навучання, Казлоўшчынская і Варапаеўская сярэднія школы, Курапольская базавая, раённая гімназія, СШ № 5 г. Паставы), індывідуальныя прадпрымаль­нікі Алена Алегаўна Шульская і Таццяна Валянцінаўна Падабедава.

— Мы ўдзячныя ўсім, хто прыняў удзел у акцыі. Дзякуй за спагадлівасць, разуменне і цяпло, якімі вы дзеліцеся з тымі, хто мае ў гэтым патрэбу, — гаворыць дырэктар сацыяльна-педагагічнага цэнтра Наталля Селіванава. — Размеркаванне сабраных рэчаў будзе праводзіцца органамі апекі і папячыцельства. Атрымаць падрабязную інфармацыю пра гэта можна ў галоўнага спецыяліста аддзела адукацыі, спорту і турызму Ніны Серафімаўны Каспяровіч па тэлефоне 5-19-01.

Пастаўчане асабліва актыўна пачалі ўдзельнічаць у акцыі з надыходам халадоў. Ад жадаючых прыняць удзел у дабрачыннасці апошні тыдзень літаральна не было адбою. Менавіта таму акцыю вырашана прадоўжыць да 15 снежня і пашырыць спіс рэчаў, якімі можна падзяліцца з дзецьмі са шматдзетных і малазабяспечаных сем’яў, а таксама з выхаванцамі сацыяльна-педагагічнага цэнтра. У першую чаргу гэта канцылярскія тавары, сродкі гігіены, прысмакі і цацкі, якія асабліва актуальныя напярэдадні калядных і навагодніх свят. Калі ў вас ёсць магчымасць падарыць дзецям часцінку цяпла, звяртайцеся па адрасе цэнтра: вул. Кааператыўная, 9, кабінет 105. Тэлефоны для даведак: 5-16-19, 5-59-65.

Вераніка ФІЛАНОВІЧ.