На Дошку гонару прадпрыемства

Адміністрацыя і прафсаюзны камітэт лясгаса шмат увагі надаюць арганізацыі працоўнага спаборніцтва, маральнаму і матэрыяльнаму заахвочванню  пераможцаў. Штогод найлепшыя работнікі атрымліваюць узнагароды Міністэрства лясной гаспадаркі Рэспублікі Беларусь,  абласнога лесагаспадарчага аб’яднання, раённага выканаўчага камітэта. Дыпломамі, Падзякамі, Ганаровымі граматамі з уручэннем каштоўных падарункаў і грашовых прэмій адзначае прафесіяналізм і майстэрства прадстаў­нікоў розных прафесій дырэкцыя прадпрыемства.

Дзейснай формай заахвочвання членаў працоўнага калектыву з’яўляецца занясенне лепшых работнікаў на Дошку гонару лясгаса. Вось і цяпер рыхтуецца яе абнаўленне. Неў­забаве на самым бачным месцы ў адміністрацыйным будынку лясгаса з’явяцца фота­здымкі памочніка ляснічага Лынтупскага лясніцтва Леаніда Руткоўскага, галоўнага інжынера Алега Галінскага, начальніка цэха Сяргея Арэхава, машыніста тралёвачнай машыны Уладзіміра Савельева, лесніка Ваўкоўскага лясніцтва Сяргея Мянчынскага, вадзіцеля Станіслава Мядзюхі, галоўнага ляснічага Валерыя Гарбуля, машыніста Аляксандра Акялана, токара Дзмітрыя Мігачова, ляснічага Юрыя Чашуна, лесніка Андрэя Мурзіча, вальшчыка лесу Славаміра Палачаніна (апошнія трое — са Старадворскага лясніцтва).

Кожны з іх вызначыўся не толькі ў працы. Так, машыніст тралёвачнай (лесанарыхтоўчай) машыны Ула­дзімір Савельеў сёлета  стаў пераможцам абласнога конкурсу “Лесаруб-2013”. Сярод амаль 20 удзельнікаў на сваім “Амкадоры”  ён паказаў вышэйшае майстэрства пры выкананні складанага задання “піраміда” і быў адным з найлепшых па ва­джэнні, манеўраванні магутнай тэхнікі. А механізатар Леанід Літві­новіч з Лынтуп, які працуе на трактары з МПТ-461-1, у сваёй намінацыі заняў другое месца.

Уладзімір Савельеў мае сярэднюю спецыяльную адукацыю. Але ніколькі не шкадуе, што прамяняў больш спакойную пасаду на работу ў лесе. Шчыра дзякуе за навуку свайму першаму настаўніку Сяргею Дразду.

У 2011 годзе У. Савельеў атрымаў новы “Амкадор”. Тэхніку асвоіў хутка,  дабіваецца на ёй высокай выпрацоўкі. Надзейны ў яго і напарнік — Сяргей Курачкін. Абодва берагуць машыну,  таму і спорыцца, дастойна цэніцца праца.

На здымку: Уладзімір Савельеў.

Тэкст і фота Пятра КУРЫЛОВІЧА.