Из рук руководителя государства

Кіраўнікі сельгасарганізацый з усіх абласцей Беларусі, якія выйшлі пераможцамі рэспубліканскага спаборніцтва (другі злева — Вячаслаў Крыштафовіч). Фота БелТА.

Сёлета ў сямнаццаты раз у Беларусі прайшоў рэспубліканскі фестываль-кірмаш працаўнікоў сяла “Дажынкі”. Яго сталіцай стаў горад Жлобін Гомельскай вобласці. 

У першы дзень, 27 верасня, пераможцаў жніва віталі намеснік Прэм’ер- міністра Беларусі Міхаіл Русы і міністр сельскай гаспадаркі і харчавання Леанід Заяц. Яны ўручылі дыпломы і грашовыя прэміі камбайнерам, вадзіцелям і аператарам зернесушыльных установак, якія сталі прызёрамі спаборніцтва. Сярод іншых дыплом і 5 мільёнаў рублёў атрымаў ва­дзіцель ААТ “Хацілы-агра” Міхаіл Ярашэвіч, які заняў трэцяе месца сярод маладых вадзіцеляў на перавозцы зерня.

Асноўныя падзеі “Дажынак-2013” прахо­дзілі з удзелам Прэзідэнта Рэспублікі Беларусь Аляксандра Лукашэнкі ў суботу, 28 верасня. Кіраўнік дзяржавы адзначыў, што за апошнія 20 гадоў наша краіна прайшла шлях ад пустых прылаўкаў і харчовых талонаў да прадуктовага багацця, экспарту сельгаспрадукцыі на 5 мільярдаў долараў. У суверэннай Беларусі, як ні ў адной краіне СНД, створана надзейная база аграпрамысловага комплексу,  працуюць магутныя трактарны і аўтамабільныя заводы, прадпрыемствы сельскагаспадарчага машынабудавання і па вытворчасці ўгнаенняў, якія не толькі забяспечваюць патрэбнасці беларускіх аграрыяў, але і актыўна прасоўваюць прадукцыю на знешні рынак. На працягу шэрага гадоў па вытворчасці асноўных відаў сельскагаспадарчай прадукцыі на душу насельніцтва Беларусь займае першае месца сярод краін СНД, а па збожжы ідзе на адным узроўні з вядомымі ўсесаюзнымі жытніцамі — Украінай і Казахстанам.

Па вытворчасці мяса Беларусь зраўнялася з Германіяй, а па малаку прыкладна ў два разы абганяе развітыя ў аграрных адносінах еўрапейскія краіны. Параўнальна невялікая Беларусь уваходзіць у пяцёрку сусветных лідараў па экспарце малакапрадуктаў.

Аднак сучасныя рэаліі патрабуюць яшчэ больш высокіх вынікаў. Важна не толькі атрымаць, але і выгадна прадаць прадукцыю, тым самым умацаваўшы эканоміку сельгаспрадпрыемстваў. Штогод дзяржава ўкладвае ў аграрны сектар амаль 2 мільярды долараў. У бліжэйшай перспектыве такая падтрымка будзе выдзяляцца адрасна, толькі на мэтавыя праграмы развіцця галін АПК і буйныя інвестпраекты, якія прынясуць хуткую аддачу.

Па традыцыі Аляксандр Лукашэнка ўзнагародзіў пераможцаў рэспубліканскага спаборніцтва па ўборцы зерневых і зернебабовых культур, якія занялі першыя месцы. Дыплом і грашовую прэмію ў памеры 90 мільёнаў рублёў з рук кіраўніка дзяржавы атрымаў і дырэктар ААТ “Хацілы-агра” Вячаслаў Крыштафовіч.

А на наступны дзень, як звычайна, ён ужо быў у полі і на фермах.

— Карыстаючыся выпадкам, хачу падзякаваць усім, хто павіншаваў нас з калектыўнай перамогай, — адзначыў В. Крыштафовіч. — Толькі гэта ўжо пройдзены этап. Клопатаў па паспяховым завяршэнні гэтага года і стварэнні надзейнай асновы будучага ўраджаю яшчэ шмат. Таму, як і раней, працуем у зададзеным рытме.»

Фота БелТа.