Поставские кондитеры снова на высоте

Залаты медаль і трэцяе месца заваявалі кандытары раённага спажывецкага таварыства на 9-ай міжнароднай спецыялізаванай выстаўцы “Хлебная і кандытарская справа”, якая праходзіла з 10 па 13 верасня ў Мінску.

Названая вышэй выстаўка з’явілася прафесі­янальным форумам хлебапёкаў і кандытараў не толькі нашай краіны, але і краін блізкага і далёкага замежжа. Дзелавая частка праграмы ўключала рэспубліканскі агляд якасці хлебабулачных і кандытарскіх вырабаў “Ласунак”,  канферэнцыю для спецыялістаў па актуальных пытаннях галіны, міжнародны чэмпіянат кандытарскага мастацтва, майстар-класы, “круглыя сталы” і іншыя мерапрыемствы.

У спецыялізаванай выстаўцы ўдзельнічала больш за 60 кампаній з розных краін свету, якія з’яўляюцца асноўнымі вытворцамі хлебабулачных і кандытарскіх вырабаў, а таксама вытворцамі і пастаўшчыкамі  абсталявання, сыравіны, інгрыдыентаў і многага іншага, што неабходна для паспяховага функцыянавання галіны. Сваю прадукцыю ў адным з павільёнаў шырока прадставіў і Белкаапсаюз. На яго выставачнай экспазіцыі цэнтральнае месца займаў шматслойны торт, выраблены пастаўскім майстрам-кандытарам Аленай Пузан.

Ала Жалейка і Алена Пузан.

—  Для нас гэта быў ганаровы і вельмі адказны заказ, які сведчыць аб прызнанні заслуг і высокім майстэрстве пастаўскіх хлебапёкаў на рэспубліканскім узроўні, — адзначыла намеснік дырэктара філіяла №2 “Каапгандаль райспажыўтаварыства” Крысці­на Красоўская. —  З папярэдніх выставак хлебнай і кандытарскай справы мы прывозілі дыпломы, бронзавы і сярэбраны медалі, на гэты раз атрымалі “золата”. Вышэйшай узнагароды агляду якасці вырабаў “Ласунак” удастоены торт “Соблазн”, рэцэптуру якога распрацавала майстар-кандытар Алена Пузан, а выпякала кандытар шостага разраду Ала Жалейка. Аўтарытэтнае журы торт “спакусіў” сваёй натуральнасцю. Для яго прыгатавання былі выкарыстаны пясочны паўфабрыкат, тварожна-сметанковы крэм, курага і чарнасліў, шакалад і шакаладнае аздабленне.

Яшчэ адна пастаўчанка, майстар-кандытар Святлана Карандашова “засвяцілася” на міжнародным чэмпіянаце кандытарскага мастацтва ў намінацыі “Арт-клас. Цукровыя кветкі”, які праводзіўся ў рамках спецыялізаванай выстаўкі і ацэньваўся суддзямі з Ісландыі, Італіі, Францыі і Расіі. Сярод 20 удзельнікаў яе выразная, яркая, адпавядаючая тэме чэмпіянату кампазіцыя “Асенняя рапсодыя” заваявала трэцяе месца.  Выступленне Святланы спецыялісты Белкаапсаюза назвалі трыумфальным, бо яна адзіная прадстаўляла кааператараў рэспублікі на  міжнародным чэмпіянаце і даказала, што і ў спажывецкай кааперацыі ёсць высокапрафесіянальныя майстры.

Святлана Карандашова ля “Асенняй рапсодыі”.

Пётр КУРЫЛОВІЧ.

Фота аўтара

і Алены Саковіч.