С выездом на место

Чарговую “прамую лінію” Віктар Сяргеевіч Гутараў правёў 24 жніўня. На выкананне пастаўленых задач кіраўнік раёна адвёў адказным за гэта асобам ад некалькіх дзён да месяца. На заканчэнне тэрміну я пацікавілася ў загадчыцы сектара па рабоце са зваротамі грамадзян і юрыдычных асоб райвыканкама Т. В. Васільчанка, ці выкананы просьбы.

А яны паступалі В. С. Гутараву самыя розныя. Па большасці з іх прадстаўнікі райвыканкама і раённых службаў выязджалі на месца і прымалі тое ці іншае рашэнне. Напрыклад, па звароце Р. А. Рагіні з вуліцы Юшкевіча ў райцэнтры работнікі  УП ЖКГ праклалі трубу ў водаадводную канаву, а Л. У. Нікіпяровіч з вуліцы Крупскай зрабілі ямачны рамонт на названай вуліцы. Акрамя таго, заяўніца прасіла паўздзейнічаць на суседзяў, чыя груша, якая расла на мяжы двух участкаў, перашкаджала. Суседзі грушу спілавалі. Пастаўчанка З. І. Януковіч званіла на “прамую лінію” па пытанні неабходнасці правядзення рамонту дарогі і абкошвання абочын у раёне шостага гарадка. Работы выкананы.

М. Ю. Міхайлава з завулка Пралетарскага прасіла абрэзаць галінкі бярозы, якія нібыта ствараюць небяспеку, бо занадта блізкія да лініі электраперадач. Энергетыкі выехалі на месца і ўбачылі, што бяроза расце на другім ад электралініі баку вуліцы і не ўяўляе сабой ніякай небяспекі. Разам з адказам у райвыканкам прадастаўлены нават здымак. І. П. Марозаву цікавіла, калі будуць уцеплены сцены іх дома № 16 па вуліцы Касманаўтаў. Адказ наступны: у адпаведнасці з графікам, камунальнікі зробяць гэта ў тэрмін да 1 снежня бягучага года.

Не проста рамонту, а мадэрнізацыі патрабуе дом ветэрана Вялікай Айчыннай вайны В. І. Ашчэпкава, размешчаны па вуліцы Савецкай у Паставах. Жонка гаспадара звярнулася на “прамую лінію” з пытаннем, калі гэта будзе зроблена. Дырэктар УП ЖКГ І. Г. Глушонак патлумачыў, што прадпрыемствам заключаны дагавор з Віцебскім абласным камунальным унітарным прадпрыемствам “Віцебскжылпраект” на выраб праектна-каштарыснай дакументацыі па аб’екце. Але яна яшчэ не зроблена па той прычыне, што ўзнікла неабходнасць дадатковага правядзення ацэнкі тэхнічнага стану дома і распрацоўкі рэкамендацый па далейшай безаварыйнай эксплуатацыі будынка з улікам яго мадэрнізацыі.

Гарачая тэма — афрыканская чума свіней і меры, якія прымаюцца па яе папярэджанні. А. І. Турон з вёскі Ажуны Варапаеўскага пассавета бедавала, што давялося зарэзаць свіней, а куды цяпер падзець ураджай, які расцілі на корм ім? А. Б. Памецька з Дунілавіч і Г. А. Хруцкая з Даравога цікавіліся парадкам выплаты кампенсацыі пры вымушаным забоі свіней. Заяўніцам патлумачана, што, у адпаведнасці з пастановай Міністэрства сельскай гаспадаркі і харчавання Рэспублікі Беларусь ад 12 ліпеня 2013 года, забараняецца ўтрыманне свіней у радыусе не менш за 5 кіламетраў ад свінаводчых комплексаў, а кампенсацыя за іх забой не прадугледжана.

Загадчык фермы ў вёсцы Чарэмушнікі СВК “Андроны” Б. А. Атрахімовіч выказаў занепакоенасць тым, што не вядзецца яе рамонт. Меры па звароце прыняты — памяшканне да стойлавага ўтрымання жывёлы ў асноўным падрыхтавана.

На “прамую лінію” паступілі і іншыя пытанні. Ні адно не засталося па-за ўвагай кіраўніцтва раёна.

Фаіна КАСАТКІНА.