Полностью механизирована

Сёлета механізаваны атрад ільнозавода завяршыў церабленне даўгунцу 26 жніўня, а за дзесяць дзён да гэтага прыступіў да ўздыму трасты. Больш ранняму ў параўнанні з леташнім правядзенню работ садзейнічала добрае надвор’е, а паскарэнню вылежкі трасты — прымяненне абарачальнікаў і ўспушвальнікаў. Апошнія і сёння працуюць на палетках. Але галоўнай сілай з’яўляюцца механізатары на прэс-падборшчыках.

— Траста ўжо ўзнята і звезена з палёў з 600 гектараў, што складае больш за палову планавай плошчы, — расказваў дырэктар ільнозавода П. Скурко. —  Нарыхтавана 1200 тон сыравіны сярэднім нумарам 1,06. Трасту ў асноўным убіралі з палёў, дзе лён быў пасеяны насеннем беларускай селекцыі. Нядрэнна ўрадзілі “васілёк”, “пралеска”, “згода”, “барэц” і іншыя гатункі даўгунцу. Але асабліва парадавалі замежныя “алізэ”, “дракар” і “сюзана”. Пад імі сёлета было занята больш за 500 гектараў зямель у ААТ “Кураполле-агра”, “Камайскі-агра”, “Янавіца-агра”. Сяўбу і церабленне льну тут праводзілі пазней, таму траста яшчэ вылежваецца. Але ўжо цяпер бачна, што выхад валакна будзе багаты. Так, на 40-гектарнай плошчы ў СВК “Андроны” сярэдні нумар трасты сорту “дракар” склаў 1,75.

З кіраўніком прадпрыемства пабывалі тут. На большай плошчы траста ўжо была запрасавана ў рулоны, якія густа ўсцілалі чысты палетак. Побач роўнымі стужкамі клаліся доўгія валакністыя расліны, якія трапілі пад вылежку жніўнай парой. На прасаванні лепшай сыравіны  з пракладкай шпагата (ёсць такі тэхналагічны прыём) працавалі найбольш вопытныя, спрактыкаваныя меха­нізатары. Віктар Пузан, напрыклад, з пачатку нарыхтовак запрасаваў 150 тон. Не намнога меншыя паказчыкі ў Аляксандра Аліноўскага і Івана Загурскага. А вось Дзмі­трыю Скурацёнку прыйшлося часова перакваліфікавацца. Ён перасеў з самаходнага падборшчыка на пагрузчык “Амкадор”. Пакуль падаспела аўтамашына з вялікагрузным прычэпам, механізатар падрыхтаваў рулоны для пагрузкі. Спатрэбілася не больш за пятнаццаць хвілін, як у кузаў акуратна было ўкладзена 40 рулонаў — па чатыры за адзін пад’езд. Такое пад сілу толькі сапраўднаму майстру. Дарэчы, віртуозна працуе на пагрузцы трасты і ветэран прадпрыемства Павел Рамановіч. Спорыцца работа і ў Аляксандра Шыкуця, які на сыравінным двары разгружае аўтамашыны і ўкладвае рулоны ў сцірты.

Кожны дзень на ўборцы і адвозцы трасты (калі не здараецца паломак і хапае паліва) працуюць 12 падборшчыкаў, у тым ліку 2 самаходныя, 4 успушвальнікі, некалькі аўтамашын і трактароў.  Разам з механізатарамі  завода  важнай сезоннай работай заняты памочнікі з шэрага прадпрыемстваў і арганізацый райцэнтра. Кіраўніцтва і спецыялісты мехатрада імкнуцца так арганізаваць іх работу, каб кожная машына выкарыстоўвалася  з найвышэйшай прадукцыйнасцю, а сыравіна добра захавалася.

Дырэктар завода не губляе надзеі, што неўзабаве будуць адноўлены работы па будаўніцтве новых вытворчых магутнасцей з устаноўкай высокатэхналагічнай бельгійскай лініі па выпрацоўцы доўгага валакна. Зараз  ствараюцца запасы высокавалакністай трасты з пракладкай шпагата. Яе плануюць закласці не менш чым дзве тысячы тон як з уласнага ўраджаю, так і з  ураджаю льну гаспадарак сыравіннай зоны, а ўсяго будзе нарыхтавана каля 4000 тон сыравіны.

Надвор’е сёлета спрыяе ільнаводам. Як запэўнілі на прадпрыемстве, уборка  трасты будзе поўнасцю механізавана.

Тэкст і фота Пятра КУРЫЛОВІЧА.