И днём и ночью

Механізатар Павел Болт і практыкант Максім Адынец.

Дзякуючы начной апрацоўцы глебы механізатары  ААТ “Кураполле-агра” першымі ў раёне завяршылі сяўбу азімых зерневых.

Сёлета па валавым намалоце зерневых і зернебабовых, які склаў 5100 тон, ААТ “Кураполле-агра” выйшла на чацвёртае месца ў раёне, а па ўра­джайнасці — 30,1 цэнтнера з гектара — на другое. Лепш урадзілі азімыя, якіх сабралі на круг па 33,5 цэнтнера. Таму на наступны год пло­шчу пад імі  вырашылі пакінуць ранейшай.  Менш чым за тры тыдні, як і прадугледжвалася планам, пасеялі 730 гектараў пшаніцы і 180 — трыцікале. Што садзейнічала правядзенню сяўбы ў лепшыя агратэхнічныя тэрміны?

— Гатоўнасць трактароў, пасяўных і глебаапрацоўчых агрэгатаў, неабходная колькасць насення, угнаенняў, спрыяльнае надвор’е, — пералічваў складальнікі дружнай работы галоўны аграном сельгаспрадпрыемства С. Астапчук. — Але самым важным лічу тое, што падрыхтоўка глебы вялася днём і ноччу. У светлы час сутак працавалі Васілій Бароўка і навучэнец-практыкант Пастаўскага прафтэхкаледжа Максім Адынец. Ноччу на змену ім на вахту заступалі механізатары Сяргей Койра і Мікалай Адынец-старэйшы і, як правіла, дабіваліся высокай выпрацоўкі.

Спецыялісты эканамічнай службы паведамілі, што Сяргей Койра, напрыклад, падрыхтаваў да сяўбы 670 гектараў глебы, у тым ліку 530 — у начную змену. Такая арганізацыя працы садзей­нічала таму, што і механізатары-сейбіты таксама рана выязджалі ў поле. У выніку Павел Болт шасціметровым агрэгатам пасеяў 655, а Аляксандр Яначкін на трохметровым “Лемкене” — 255 гектараў азімых зерневых. Механізаваную загрузку насення забяспечвалі Андрэй Жахоўскі і Аляксандр Гузноў. Дарэчы, сяўбу на ўсёй 910-гектарнай плошчы правялі толькі элітай і насеннем першай рэпрадукцыі. На ўнясенні хлорыстага калію пастараўся Юрый Сівы.

Работы ў полі працягваюцца. У гаспадарцы вырашылі пасеяць яшчэ 150 гектараў азімых зерневых на зялёны корм, вядуцца ворыва зябліва, уборка кукурузы на сілас.

Тэкст і фота Пятра КУРЫЛОВІЧА.