Сярод падпісантаў звароту за непадзельную і незалежную Украіну – нашыя землякі

Прадстаўнікі беларускай інтэлігенцыі выказалі салідарнасць з украінскім народам. Сярод падпісантаў адкрытага звароту, размешчанага на сайце грамадзянскай кампаніі «Гавары праўду», ёсць і нашыя землякі.

Адкрыты зварот ужо падтрымала больш за шэсцьдзесят чалавек. Сярод падпісантаў – Уладзімір Арлоў, Валеры Булгакаў, Аляксей Марачкін, Уладзімір Някляеў, а таксама палачане Лера Сом і Ірына Жарнасек.

Тэкст звароту цалкам:

Зварот дзеячаў навукі, мастацтва і культуры Беларусі да ўкраінскага народу, парламента і ўрада

Мы, ніжэйпадпісаныя грамадзяне Рэспублікі Беларусь, выказваем сваю падтрымку народу Украіны ў гэты няпросты для яго час.

Вы ўступілі ў новы перыяд сваёй дзяржаўнасці. Само па сабе гэта ўжо выпрабаванне як для ўрада, так і для ўсяго ўкраінскага грамадства. На вялікі жаль, змены, якія адбыліся ў вашай краіне, азмрочаныя гібеллю людзей. Вечная памяць і слава героям!

Мы лічым, што кроў не павінна праліцца яшчэ раз. Памяць пра Нябесную сотню Майдана абавязвае ўсіх утрымацца ад развязвання вайны.

Цяпер вы сутыкнуліся з праблемай сепаратызму, якая пагражае выліцца ў ўзброены канфлікт. Рэферэндум па далучэнні Крыма да Расіі з’яўляецца замахам на тэрытарыяльную цэласнасць Украіны і супярэчыць яе Канстытуцыі і нормам міжнароднага права.

Мы рашуча асуджаем усе спробы дзяліць Украіну па этнічным прынцыпе і выступаем за мірнае вырашэнне праблемаў унутры краіны самімі грамадзянамі Украіны ў рамках закона.

Для нас, беларусаў, Харкаў, Данецк, Сімферопаль, Адэса — гэта такія ж украінскія гарады, як Львоў, Луцк, Чарнаўцы і Палтава. Украіна павінна захавацца ў межах, якія замацаваліся за ёй з моманту падпісання Белавежскіх пагадненняў.

Мы з вамі, мы – за непадзельную Украіну, мы — за незалежную еўрапейскую Украіну, будучыню якой мае права вырашаць толькі яе народ.

Слава Украіне!

Далучыцца да падписантаў можна на сайце грамадзянскай кампаніі «Гавары праўду», якая акцыю ініцыявала.