Пакуты жыхароў вуліц г. Глыбокае

Вуліца Я. Коласа
Вуліца Заслонава
Наўрат рызыкне хто небудзь, апроч джыпа, праехаць па вуліцы Чкалава
Зав. Кірава

Сапраўды пакутуюць людцы на вуліцах, якія па распаражэнню Глыбоцкага райвыканкама павінны абслугоўваць прадпрыемствы і арганізацыі горада. Тэлефануюць аўтару гэтых радкоў, просяць сфатаграфаваць, напісаць аб іх бедах у прэсе, перадаць праз газету і інтернэт так мовіць “Запыт да дэпутатаў Глыбоцкага раённага савета”.

- Няўжо мы сапраўды забытыя раённым кіраўніцтвам і яны нічога не бачаць, што іх рашэнні пусты гук – усхвалявана абураўся суразмоўца - бедавалі зіму, калі засыпала снегам і нікога гэта не турбавала, цяпер, калі вуліцы раскіслі і ўсе ў калдобінах ад нерасчышчанага і ўтаптанага за зіму снегу, а раніцамі скаваныя марозам.

А на працу, дзеткам у школу і садзік трэба трапіць штодзень і ў тэрмін. Дый хутка пацяплее – зноў паводка, якая не міне нашых падворкаў. Няхай бы асабістым пунктам у гэтым распаражэнні абавязалі кіраўнікоў прадпрыемстваў і арганізацый, абавязкова пасля снегападу, аб’язжаць па закрэпленных вуліцах. Я бы паглядзеў, як бы на ўласным аўто той ці іншы кіраўнік праехаў па нашай вуліцы і што адбылося з тэхнічным станам яго аўтамабіля.

Проста людзі ў нас юрыдычна неадукаваныя, церпялівыя і моўчкі трываюць. У прававой дзяржаве па судах бы зацягалі і ці вытрымаў бы бюджэт віноўных арганізацый на выплату штрафаў і за кампенсацыю матэрыяльнай і матэрыяльнай шкоды.

Я цалкам згодны з меркаваннем гэтага грамадзяніна і здымкі, якія я зрабіў, адрасую ў першую чаргу дэпутатам раённага Савета, якія білі кулаком сабе ў грудзі, абяцаючы ўпарта адстойваць правы і інтарэсы сваіх выбаршчыкаў. Таму, шаноўныя дэпутаты з вызначаных вуліц Вашай акругі (вул.: Я.Коласа, Заслонава, Палявая, Чкалава, зав. Кірава ды і шмат іншых) , можаце лічыць змест гэтага артыкула афіцыйным запытам Вашых выбаршчыкаў і можаце даць адказ у каментах на сайце http://westki.info/ і газету “Вольнае Глыбокае”.