"Крулеўшчына", "Шаркаўшчына", "Палевачы" - на афіцыйным сайце БЧ адмовілася ад паланізмаў

Беларуская чыгунка 2 красавіка запусціла беларускамоўную версію афіцыйнага сайта - rw.by/be. Прыемным прэцэдэнтам стала адмова ад паланізаваных версій напісання некаторых станцый.

У 1919-39 гадах наш рэгіён быў у складзе ІІ Рэчы Паспалітай, дзе дзяржаўнай мовай была польская. Калі ў верасні 1939 года прыйшлі Саветы, назвы чыгуначных станцый былі транслітараваная з польскай мовы - і дасёння на вакзалах пішацца "Круляўшчызна", "Палявачэ", "Параф'янаў", "Шаркаўшчызна".

Упершыню Беларуская чыгунка адыйшла ад гэтай практыкі - у раскладзе прыгарадных цягнікоў (рэгіянальныя лініі эканом-класа) напісана "Крулеўшчына", Палевачы", "Шаркаўшчына".

Паводле дасведчанага супрацоўніка Беларускай чыгункі, удзельніка форума railwayz.info, гэта было зроблена паводле парады тапанімічнай камісіі Акадэміі навук Беларусі. Паводле камісіі, назвы станцый трэба прывесці ў адпаведнасць назвам населеных пунктаў.

Што праўда, чыгуначнікі падпісалі станцыю "Параф'янаў", хоць мястэчка называецца Параф'янава.

База пошуку і сістэма продажу квіткоў на цягнікі далёкага руху (рэгіянальныя лініі бізнэс-класа, міжрэгіянальныя лініі, міжнародныя лініі) дзейнічае пакуль што па-расійску і "ведае" толькі паланізаваныя назвы. Гэта звязана з тэхнічнымі складанасцямі: пошук прывязаны да сістэмы "Экспрэс", якая ахоплівае чыгункі ўсіх кран былога СССР.

Было б добра, каб адміністрацыя Беларускай чыгункі зусім адмовілася ад паланізаваных назваў, якія ў незалежнай Беларусі гучаць вельмі недарэчна. Ды каб чыгуначнікі перасталі пісаць на вакзалах шыльды па-расійску, як гэта зрабілі, напрыклад у Глыбокім... перад Днём беларускага пісьменства.

Дарэчы, на сайце чыгункі можна знайсці расклад усіх цягнікоў, што ходзяць па Беларусі. Добра, што пры пошуку маршрута загадзя паведамляецца пра адмены прыгарадных цягнікоў. Праезд у пасажырскіх цягніках можна аплаціць праз Інтэрнэт пры дапамозе банкаўскай карткі - касу тады ісці не трэба, досыць паказаць правадніку пашпарт. Адрас - rw.by/be