Алег Морхат будзе прызначаны старшынём Віцебскага аблвыканкама, а Косінца адправяць паслом у Інданэзію (першакрасавіцкі жарт)

Алег Морхат, старшыня Глыбоцкага райвыканкама. Фота Кастуся Шыталя, 1 верасня 2012 года.

Як паведамляюць вартыя даверу крыніцы, цягам бліжэйшага тыдня выйдзе указ Лукашэнкі, паводле якога старшыня Глыбоцкага райвыканкама Алег Морхат будзе прызначаны старшынём Віцебскага аблвыканкама.

Цяперашняму старшыню аблвыканкама Аляксандру Косінцу быццам бы паабяцалі пасаду пасла Рэспублікі Беларусь у Інданэзіі. Дыпламатычную пляцоўку ў гэтай перспектыўнай краіне-партнёры Беларусі плануецца адчыніць ужо ў красавіку.

Як адзначае ананімная крыніца, у Адміністрацыі Прэзідэнта даўно прыглядаліся да асобы Алега Морхата, адзначаючы яго руплівасць у падрыхтоўцы да Дня беларускага пісьменства, выкананні праграмы “Чыстыя палі”, уборцы гародніны і ільну, а таксама падвышэнні надояў малака і паляпшэнні дэмаграфічнай сітуацыі.

Як адзначыў Алег Морхат у размове з карэспандэнтам “Вестак” Глыбоцкім ваўком, першым рашэннем на пасадзе старшыні аблвыканкама будзе абвяшчэнне добраахвотнага збору сродкаў на будаўніцтва лядовага палаца ў Глыбокім. Гэта падзяка Алега Віктаравіча глыбачанам за плённае супрацоўніцтвам цягам апошніх трох год.

Асаблівую ўвагу Морхат думае надаць развіццю сельскай гаспадаркі. Вядзецца пошук інвестараў для праекта асушэння возера Шо і будаўніцтва на гэтым месцы фермы для развядзення авечак. А ў вёсцы Латыголь Глыбоцкага раёна плануецца пераабсталяваць ферму для вытворчасці мармуровага мяса. Выканаць гэты праект даручана ААТ “Канстанцінаў Двор”.

Сёлета Прэзідэнт абвесціў Год беражлівасці, і з гэтым звязаныя шматлікія задумы. Алег Віктаравіч распавёў, што загадае ўсталёўваць на даху дзяржаўных установаў сонечныя батарэі. Дзеля гэтага будуць выкарыстаныя добраахвотныя ахвяраванні работнікаў адукацыі і культуры.

На Варганскай гары ў Докшыцкім раёне будзе збудаваны ветрапарк, такі ж з’явіцца на Замкавай гары ў Браславе. Таксама плануецца ўзгадаць практыку існавання школьных лясніцтваў – але называцца цяпер яны будуць “школьныя леспрамгасы” і займацца нарыхтоўкай мясцовых відаў паліва для ацяплення школаў.

Таксама сёння на адным з інтэрнэт-сайтаў з’явілася абвестка аб продажы машыны Mitsubishi Outlander XL, прадавец падпісаўся як “О. В., г. Глубокое”.

Калі артыкул рыхтаваўся да публікацыі, аўтару патэлефанаваў журналіст Зьміцер Лупач і паведаміў са спасылкай на супрацоўніка чыгуначнай станцыі “Глыбокае”, што ранішні цягнік з Крулеўшчыны прыцягнуў два таварныя вагоны, замоўленыя Глыбоцкім райвыканкамам. Выказваецца здагадка, што вагоны прызначаныя для перавозкі асабістых рэчаў Алега Морхата.

* * *
Рэдакцыя “Вестак” віншуе чытачоў з 1 красавіка, жадае добрага настрою і паведамляе, што выкладзеная вышэй інфарамацыя не мае ніякага дачынення да рэальных падзеяў і асобаў :)