Абраны новым Папам аргенцінец Хорхе Марыё Бергольё. Будзе служыць пад імем Францішак (абноўлена 0:23, ПАПРАЎЛЕНЫ пераклад прывітання Папы, фота з плошчы св. Пятра)

Абраны новым Папам Хорхе Марыё Бергольё - аргентынец з італьянскімі каранямі. Будзе служыць пад імем Францішак.

Кардыналы-выбарцы абралі аргентынскага кардынала Хорхэ Берголіа 266-м Наступнікам св. Пятра. Новы Папа абраў сабе імя Францішак.

Папа Францішак заўсёды вёў вельмі просты лад жыцця. Будучы арцыбіскупам Буэнас-Айрэса жыў у маленькай кватэры, якая мала нагадвае арцыбіскупскі палац, адмовіўся ад персанальнага лімузіна з шафёрам на карысць грамадскага транспарту і па некаторых паведамленнях сам сабе гатаваў ежу, піша Радыё Ватыкана.

Аб абранні Папы абвясціў у 20.11 па рымскім часе з балкону цэнтральнай лоджыі базылікі св. Пятра кардынал-протадыякан Жан-Луі Таран, які, звяртаючыся да сабраных, прамовіў традыцыйную формулу: “Habemus Papam!” (У нас ёсць Папа), а затым назваў імя новаабранага Пантыфіка.

Адразу пасля гэтага на балконе з’явіўся сам Папа, каб прывітаць вернікаў і ўдзяліць ім сваё першае апостальскае благаслаўленне “Urbi et Orbi”. Францішак І таксама звярнуўся да сабраных вернікаў. Ён пажартаваў, што, каб “даць Рыму Біскупа (...) браты-кардыналы скіраваліся “аж на край свету”. Ён падзякаваў жыхарам Вечнага Горада за адкрытасць і заклікаў памаліцца за Папу на пенсіі Бэнэдыкта XVI. Пасля чаго разам з усімі прамовіў “Ойча наш”, “Вітай Марыя” і “Хвала Айцу”. Пасля малітвы Святы Айцей адзначыў, што з гэтага дня пачынаецца шлях супрацоўніцтва, братэрства і любові паміж ім і народам. Ён заклікаў маліцца, каб ва ўсім свеце настала сапраўднае братэрства, піша Радыё Ватыкана.

Браты і сёстры, добры вечар!

Як вам вядома, абавязкам канклава было надаць Рыму біскупа. Выглядае на тое, што мае браты-кардыналы дайшлі аж да краю зямлі, каб знайсці яго… але вось мы тут. Дзякую вам за прывітанні ад дыяцэзіяльнай супольнасці Рыма.

Перш за ўсё хачу вас прасіць аб малітве за нашага Папу-пенсіянера Бенедыкта XVI, каб Гасподзь яго дабраславіў, а Маці Божая аберагала.

Ойча наш…
Вітай, Марыя…
Хвала Айцу…

Цяпер пачынаем гэтае падарожжа, Біскуп і народ, гэтае падарожжа Рымскай царквы, якая ў любові ўзначальвае ўсе Цэрквы, падарожжа братэрства ў любові і ўзаемным даверы. Будзьма маліцца адны за адных. Будзьма маліцца за ўвесь свет, каб у ім панавала пачуццё братэрства. Жадаю, каб гэты шлях Царквы, які сёння зноў пачынаем, быў плённы для евангелізацыі гэтага цудоўнага горада.

А зараз я хачу ўдзяліць вам дабраславенне, але найперш хачу папрасіць вас аб паслузе. Перад тым, як біскуп дабраславіць народ, я прашу вас, каб вы маліліся, каб Гасподзь дабраславіў мяне – аб малітве народа за іх Біскупа. Памаліцеся – вашую малітву за мяне – у цішыні.

А цяпер я ўдзяляю маё дабраславенне вам і ўсяму свету, усім мужчынам і жанчынам добрай волі.

Браты і сёстры, пакідаю вас. Дзякуй за віншаванні. Маліцеся за мяне, і хутка ўбачымся.

Да хуткай сустрэчы.

Заўтра маліцца Багародзіцы, каб яна абараняла Рым.

Спакойнай ночы і добрых сноў!

, сказаў Папа.

Такім чынам, 266-ы Рымскі Пантыфік быў абраны на працягу трэццяй сесіі ў другі дзень галасавання. Несумненна, гэты канклаў увойдзе ў гісторыю як адзін з самых хуткіх па працягласці.

У 2005 годзе Бенедыкт XVI быў абраны на другі дзень галасавання пасля чатырох раўндаў галасавання.

Любімымі пісьменнікамі Бергольё называе сваіх суайчыннікаў Хорхе Луіса Борхеса і Леапольда Марэчаля, а таксама класіка расійскай літаратуры Фёдара Дастаеўскага.

Новы Папа — вялікі аматар футболу. Цікава, што заўзее ён не за звышпапулярныя ў Аргенціне «Бока Хуніёрс» ці «Рывет Плэйт», а за клуб «Сан-Ларэнца». Ён імкнецца не прапусціць ніводнага матча любімай каманды, нават гульня праходзіць на выездзе. Цяпер гэта будзе зрабіць цяжэй. Каманда «Сан-Ларэнца» названая ў гонар святога Лаўрэнція, а таксама каталіцкага святара Ларэнса Масы, які дапамагаў клубу. «Сан-Ларэнца» — дзесяціразовы чэмпіён Аргенціны.

Новаабраны Папа Францішак І нарадзіўся 17 снежня 1936 г. у Буэнас-Айрэсе (Аргенціна) у сям'і італьянскага эмігранта — работніка чыгункі. Належыць да Ордэна езуітаў, у які ўступіў 11 сакавіка 1958 г. У 2005–2008 гг. узначальваў епіскапат Аргенціны. Член Кангрэгацыі Божага Культу і Дысцыпліны Сакрамэнтаў, Кангрэгацыі па справах Духавенства, Кангрэгацыі інстытутаў кансэкраванага жыцця і таварыстваў апостальскага жыцця, Папскай рады па справах сям'і.