У Глыбокім пройдзе вішнёвы фэст, а горад стане вішнёвай сталіцай Беларусі

Глыбокае рыхтуецца абвясціць сябе вішнёвай сталіцай Беларусі. Але для пачатку правядзе вішнёвы фэст, падрыхтоўка да якога ўжо пачалася, расказалі карэспандэнту БЕЛТА ў аддзеле фізічнай культуры, спорту і турызму Глыбоцкага райвыканкама.

На Віцебшчыне ўсе добра ведаюць, што цяжка адшукаць вішні, смачней глыбоцкіх. Некалі вішнёвыя сады ў Глыбоцкім раёне заклаў мясцовы аграном Баляслаў Лапыр, які прывозіў высадкі з Польшчы. Менавіта з яго садоў сакавітая, салодкая і зімаўстойлівая вішня ўвайшла спачатку ў тутэйшыя сялянскія сядзібы, а потым пашырылася па ўсім краі. Дагэтуль вішнёвая слава Глыбокага перадаецца з вуха на вуха, і ў дні збору ўраджаю прыцягвае ў мястэчка нямала запаслівых гаспадароў.

Мясцовыя арганізатары турыстычнага адпачынку вырашылі выкарыстоўваць вішню ў сваіх мэтах і правесці ў сярэдзіне будучага лета вішнёвы фэст. Балазе ў горадзе, дзякуючы прайшоўшаму тут у верасні Дню беларускай пісьменнасці, створана добрая турыстычная інфраструктура. Праграма фэсту ўжо вярстаецца. У яе ўвойдуць кулінарнае шоу, забаўляльныя праграмы з вішнёвым падтэкстам, але галоўнай падзеяй стане вішнёвы кірмаш. Увесну глыбачане збіраюцца закласці вішнёвы сад з дрэвамі з розных куткоў свету.

Праект глыбачан "Вішнёвы фэст" заняў другое месца ў нядаўна прайшоўшым рэспубліканскім конкурсе творчых прац па прасоўванні гарадоў і рэгіёнаў Беларусі ў рамках III Міжнароднага форума "Імідж Рэспублікі Беларусь: час дзейнічаць". Па меркаванні экспертаў, гэты праект дазволіць прыцягнуць увагу да рэгіёна, павялічыць паток турыстаў, а галоўнае - стварыць новы турыстычны брэнд. У якасці ўзнагароды распрацоўкай глыбоцкага вішнёвага брэнда зоймецца прызёр Міжнароднага фэсту рэкламы "Канскія львы" рэкламнае агенцтва "Крынь".

Варта адзначыць, што вішню любяць усюды, таму і вішнёвыя фэсты праводзяць у многіх краінах: У ЗША такіх фэсту два - у Вашынгтоне і Трэвер-сіці, у Харватыі вішнёвай сталіцай лічыцца Лаўран, у Літве - мястэчка Жагарэ, а ў Расіі - Уладзімір.