Супрацоўніца дзіцячага садка №2: “Адна шкода кругом”

Дзіцячы садок №2, што знаходзіцца па вуліцы Мікалаева ў Глыбокім, церпіць ад падвыпітай моладзі.

Свае беды супрацоўнікі садка найперш звязваюць з кавярняй “Лаліта”, якая месціцца побач. Побач з кавярняй тусуецца моладзь, якая, па словах супрацоўнікаў садка, пасля наносіць шмат шкоды: ломяць плот, кідаюць на тэрыторыя садка пустыя бутэлькі і іншае смецце.

“Плот у нас вельмі прыгожы, напэўна, у горадзе такога больш няма. Мы яго пастаянна рамантуем. Спачатку верх адломваюць, каб усесціся можна было, а потым проста нагамі ломяць, абы толькі шкоду нанесці,” – распавядае Таццяна Іосіфаўна Дук, намесніца загадчыцы садка. Яна таксама кажа, што кідаюць смецце на тэрыторыю садка і навакольныя жыхары: “Калі вароты закрытыя, то ў іх няма доступу да нашага кантэйнера, і яны проста праз плот перакідваюць смецце. Аднойчы прывалаклі проста пад дзверы. Адна шкода кругом.”

Яшчэ адна бяда для садка – начная крама “Пралеска”, якая месціцца непадалёк на вуліцы Маскоўскай. “Пралеска” таксама дапамагае жыць. Мы зрабілі заўвагу прадаўцу, яна ў адказ: “Што вы, я закон не парушаю, я не прадаю віна або гарэлкі,” – кажа Таццяна Дук.
Вядома, віны прадаўца тут няма. Гандаль спіртным і півам тут дазволены, не прадаюць тут толькі таннага алкаголю. Ды і зразумела, для гэтых мэтаў крама і адкрывалася. Цяжка ўявіць сабе чалавека, які сярод ночы пойдзе ў краму за каўбасой або смятанай.
Звечара ў выходныя дні ў краме нават утвараюцца чэргі. Цікава выглядае надпіс на сцяне крамы, што інваліды і ўдзельнікі Айчыннай вайны абслугоўваюцца без чаргі. Іх наогул засталося няшмат, а ўявіць сабе іх у чарзе ў начной краме ўяўляецца па меншай меры дзіўным.

Вядома, ўзяўшы ў краме піва або гарэлкі, моладзь не будзе яе піць на цэнтральнай вуліцы, дзе можна патрапіць пад міліцэйскі патруль. Маладыя людзі і ідуць на сцежку паміж “Лалітай” і дзіцячым садком. А там месца для такой мэты ідэальнае. Міліцыя туды амаль не наведваецца.

Дадзім слова Таццяне Дук:

– Мы на такім месцы знаходзімся паміж “Лалітай” і “Пралескай”, тут рух усю ноч.Пасля выходных у нас што робіцца, і ў выходныя, у нас бутэлькі кідаюць на тэрыторыю, шкло пабітае, самі ходзім, прыбіраем, каб дзеці не параніліся. Месца жахлівае.

Мне стораж звоніць і кажа, што тры кампаніі выправадзіла ў прамежак паміж 9 і 11 гадзінамі вечара. І што іх толькі сюды цягне, яны ж п’яныя, зневажаюць. Потым пасля іх нават дзяцей гадка запускаць на пляцоўку.

Міліцыя наведваецца зрэдку, хаця мы і маем права выклікаць ахову, тут часта адбываюцца бойкі. У нас шмат дзяцей з нядобранадзейных сем’яў, мала таго, што гэтымі сем’ямі прыходзіцца займацца, даводзіцца яшчэ змагацца з наступствамі начных гулянак.