Сайт райвыканкама ўмяшаўся ў спрэчку вакол глыбоцкага музея

Глыбоцкі райвыканкам на сваім сайце адказаў на публікацыю краязнаўцы Уладзіміра Скрабатуна, прысвечаную рэканструкцыі будынка краязнаўчага музея ў Глыбокім.

Краязнаўца, спасылаючыся на ананімныя крыніцы ва ўстановах культуры, выказаў сумнеў у патрэбе ўцяплення будынка. А таксама выказаў занепакоенасць тым, што рэканструкцыя зменіць аўтэнтычны выгляд будынка. Дадамо, што Уладзімір Скрабатун мае адукацыю інжынера-будаўніка.

"Кіраўніцтва музея можа сказаць наступнае - піша сайт райвыканкама - : каб паважаны спадар Скрабатун не збіраў плёткі па горадзе, а прыйшоў непасрэдна ў музей, то, магчыма, не быў бы такім катэгарычным.

Па-першае, гэта робіцца для таго, каб уцяпліць памяшканне. У зімовы час тэмпература паветра ў экспазіцыйных памяшканнях рэдка перавышае 8 градусаў, а мінімальнай нормай для захавання экспанатаў Міністэрствам культуры ўстаноўлена 18 градусаў. Да таго ж на адной са сценаў з’явілася вялікая трэшчына. Такія ўмовы захавання вельмі шкодныя для музейных прадметаў, якія Уладзімір Іванавіч, відаць, не лічыць вартымі зберагчы.

Па-другое, будынак абшываецца пенапластам і тынкуецца толькі з двух бакоў, фасад жа будынка музея застаецца нязменным, больш таго, на бліжэйшы час запланавана яго рэстаўрацыя.

Па-трэцяе, будынак гісторыка-этнаграфічнага музея па вуліцы Энгельса ніколі не быў унесены ў спіс помнікаў гісторыка-культурнай спадчыны Беларусі, а таму аўтару артыкула варта было б спачатку праверыць інфармацыю, а не абвінавачваць людзей у такіх злачынствах, як вандалізм.

Так што ўсе работы, якія выконваюцца на аб’екце, накіраваныя на зберажэнне нашай гістарычнай спадчыны, а не наадварот, як гэта здаецца аўтару артыкула.

Чытай таксама:
Будынак музею ў Глыбокім стаў чарговай ахвярай падрыхтоўкі да Дня пісьменства
Антон Астаповіч: Помнікі абараняюцца не лямантам