Кардынал Вёлькі на фэсце ў Браславе: "Абраз Маці Божай – гэта сведчанне вялікай любові людзей"

“Я бачу Цябе, Марыя, у тысячы абразах ва ўсім свеце” – гэтымі словамі з верша распачаў сваю прамову да сабраных вернікаў Кардынал Райнер Марыя Вёлькі, Арцыбіскуп Берліна, падчас урачыстасці ў гонар Маці Божай Валадаркі Азёраў 17 жніўня ў Браславе.

Шматлікія вернікі сабраліся ў такі цудоўны дзень , каб ушанаваць сваю Нябесную Заступніцу. Радаснай падзеяй для прысутных стала прывітанне рэліквій св. Тэрэзы ад Дзіцятка Езус. Апостальскі Адміністратар Віцебскай дыяцэзіі, ксёндз пралат Францішак Кісель заклікаў прысутных на ўзор святой перамагаць свае цяжкасці, асабліва перамагаць свой эгаізм. Ён казаў: “Мы павінны выкарыстоўваць шлях да святасці св. Тэрэзы. Нам трэба кінуцца ў абдымкі Богу і тады на нас сыйдзе дождж ружаў - Божых ласк - з неба.”

Сярод прысутных было шмат гасцей не толькі з Беларусі, але з–за мяжы, а менавіта госці з Польшчы і Германіі.

Падчас гаміліі кардынал Вёлькі, які быў галоўным цэлебрантам Эўхарыстыі, звярнуў увагу ўсіх прысутных на тое, што кожны абраз Маці Божай – гэта сведчанне вялікай любові людзей да Яе. “Марыю любяць усе людзі: простыя і навукоўцы, грэшнікі і праведнікі – усе яе любяць. Любяць, бо Яна Маці Жыцця.”

Таксама кардынал прывёз крыжы для капітулы канонікаў Віцебскай дыяцэзіі, якія яны будуць насіць. Сам арцыбіскуп іх асвяціў і ўручыў канонікам. Гэтыя крыжы сталі знакам еднасці паміж Касцёлам на Віцебшчыне і Патсдамам.

На заканчэнне ўрачыстасці адбылося прысвячэнне дыяцэзіі і ўсёй краіны Маці Божай Валадаркі Азёраў. Пасля чаго кардынал Райнер Марыя Вёлькі падзякаваў усім прысутным за сведчанне жывой веры Касцёла на Беларусі, асаблівую падзяку скіраваў старэйшаму пакаленню за тое, што захавалі скарб веры ў камуністычныя часы. І дадаў: “ Мы ўсе павінны ведаць, што вольнасць нам дадзена Богам і ніхто і ніколі не зможа яе ў нас забраць! Мы - Божыя дзеці і корань нашай свабоды ў Ім!” .

Таксама прагучала шмат цёплых слоў падзякі да ўсіх прысутных гасцей, святароў і прысутных ад імя арганізатараў, супольнасці айцоў сальватарыянаў у Браславе.