Як прайшоў Дзень Волі ў Горках?

Горацкія патрыёты учора раніцай павіншавалі студэнтаў БДСГА святочнымі паштоўкамі, прысвечанымі незалежнасці Беларускай Народнай Рэспублікі.
Многія студэнты пра гадавіну абвяшчэння незалежнасці Беларускай Народнай Рэспублікі даведваліся ўпершыню з невялікага тэксту ў паштоўцы.

Сваю віншавальную акцыю актывісты распачалі а палове на восьмую раніцы, калі моладзь ішла на заняткі. Мала хто з навучэнцаў адмаўляўся ад паштовак. Некаторыя тут жа іх чыталі, некаторыя хавалі ў кішэні. Акцыя доўжылася меней за гадзіну. Адна з удзельніцаў Яніна адзначае:

"Спадабалася тое, што некаторыя людзі гэтыя паштоўкі з усмешкай бралі. Не падабалася тое, што некаторыя казалі: „Ай, нам гэта не патрэбна!“ Некаторыя, наадварот, віншавалі і мяне, але такіх мала было".
Карэспандэнт Радыё "Свабода" распытаў студэнтаў БДСГА пра Дзень Волі.

"Чаму гэты дзень называецца Днём Волі?"

– Беларускі народ атрымаў сваю свабоду. У яго з'явілася свая воля. Адсюль і Дзень Волі.

– Утварылася чыста беларуская дзяржава. Яна стала належаць толькі сабе.

– Ад 1918 году лічымся Рэспублікай Беларусь. Пачалася гісторыя суверэннай дзяржавы Беларусь. Да гэтага мы былі падзеленыя на губерні. Частка Беларусі была занятая Польшчай, а частка Расіяй. Ад гэтага году мы аб’ядналіся.
– У гэты год Беларусь утварылася. Тады быў закладзены сэнс Беларусі нашай.

– Беларусь, калі атрымала суверэнітэт, то заявіла пра гэта на ўсю Еўропу. Гэта быў дужа важны крок. Тады атрымаць незалежнасць было вельмі цяжка. Мы павінны захоўваць памяць пра нашых продкаў і памятаць гэтую дату.

Карэспандэнт: "25 сакавіка 1918 году была абвешчана незалежнасць Беларускай Народнай Рэспублікі. Ці чулі што пра гэта?"
– На жаль, у мяне цяпер галава іншым занятая. Нічога такога не чуў.

– Без паняцця!

Карэспандэнт: "Будучым аграрнікам не патрэбная гісторыя, знакавыя падзеі?"

– Напэўна, не трэба. Я пра гэта нічога не чуў.

– Што па гісторыі праходзілі, тое і чуў.

Карэспандэнт: "Што праходзілі па гісторыі?"

– Відаць, вы не таго спыталі!
– Гісторыю вывучалі. Праходзілі, але з часам усё забываецца.

Яшчэ адна ўдзельніца акцыі, спадарыня Лілія, адзначае рэакцыю студэнтаў на віншаванні:

"Дзякавалі і пыталіся, вядома: „Што за свята такое?“ Вельмі прыемна было казаць, што гэта наш Дзень Волі. Мы традыцыйна на гэтым месцы раздаём. Некаторыя мо і ведаюць, а некаторыя і ўпершыню даведаліся".

Штогод горацкія патрыёты ўскладаюць кветкі на магілу студэнта Горы-горацкага земляробчага інстытута, які ўдзельнічаў у паўстанні пад кіраўніцтвам Кастуся Каліноўскага. Войцех Дамарацкі загінуў падчас вызвалення Горак ад царскай улады. Да сёння ў дэндрапарку акадэміі захавалася магіла з памятнай плітой у гонар мужнага хлопца.

Сёлета ўсе падыходы да пахавання завалены снегам...
svaboda.org & horki.info