Жанна Шчарбініна ізноў ідзе ў дэпутаты

horki.info Новости Горок | 20-01-2014

Незалежная дэпутатка Аўсянкаўскага сельсавету Жанна Шчарбініна збіраецца рэгістраваць сваю ініцыятыўную групу.

Шчарбініна вядомая не толькі тым, што ў 2008 годзе стала дэпутаткай, якую падтрымлівалі дэмакратычныя сілы, але і сваім канфліктам з мясцовай школай.

Як паведамляў horki.info, восенню 2013 года настаўніца паскардзілася ў Міністэрства адукацыі на тое, у якім стане знаходзіцца ейны кабінет у Аўсянкаўскай школе. Адасланыя фотаздымкі інтэр'еру абляцелі СМІ і нарабілі шуму. Рамонт у памяшканні адбыўся, а Шчарбінінай, паводле яе сцвярджэнняў, давялося звольніцца з працы.

Цяпер стала вядома, што былая настаўніца не збіраецца здавацца і пойдзе на другі тэрмін, бо лічыць, што дэпутаты сельскіх саветаў дапамагаюць людзям паляпшаць умовы жыцця. Шчарбініна прызнае, што ахвочых балатавацца ў сельсавет няшмат. Паводле яе, шмат каго ўгаворваюць вылучацца на дэпутацтва.

«Калі ў дэпутаты ідуць людзі, якіх альбо просяць, альбо прымушаюць, то зразумела, што яны не будуць заглыбляцца ў мясцовыя праблемы. А калі сам чалавек хоча, як я, то мясцовыя праблемы вырашаюцца.

Перыядычна людзі ў сельскі савет звяртаюцца. Яны ведаюць, што сельскі савет існуе і што ёсць у яго нейкія функцыі, і свайго патрабуюць», – тлумачыць намеры балатавацца ў сельсавет Жанна Шчарбініна.

Кандыдатка вылучаецца як незалежны прэтэндэнт.

«Можа, нехта і далучае мяне да апазіцыі, але я сябе ў апазіцыю не ўлучаю. Я тут проста дысідэнтка. Апазіцыя цяпер гучыць дужа галосна, і стаўленне да яе негатыўнае. Шмат яны гавораць, але дужа мала яны робяць. Я жыву ў гэтай мясцовасці, і праблемы мясцовыя, якія мяне тычацца, я стараюся неяк вырашаць».

Суразмоўніца зазначае, што падтрымлівае сувязі з некаторымі лідарамі апазіцыі і застаецца прыхільніцай Беларускай хрысціянскай дэмакратыі.

Жанна Шчарбініна кажа, што людзей прывучылі быць пасіўнымі. Насельніцтва актывізуецца, зазначае яна, калі ёсць праблема, якая закранае інтарэсы адразу многіх людзей. Тады з'яўляюцца і лідары.

Напрыклад, пагроза закрыцця ў Аўсянцы паліклінікі выклікала пратэст вяскоўцаў. Людзі абаранілі яе. Сярод абаронцаў была і дэпутатка Шчарбініна.

Статус дэпутата, зазначае яна, дапамог развязаць пытанне будаўніцтва ў вёсцы станцыі абезжалезвання і заблакаваць узвядзенне шкоднага для наваколля свінакомплексу.

svaboda.org

Заметили ошибку? Выделите текст, нажмите Ctrl+Enter и оставьте замечание!

Написать комментарий

Информация

Чтобы написать комментарий вам нужно авторизоваться или зарегистрироваться

Обращались ли вы за помощью в милицию?