Кошт перамогi

21 ліпеня, Мінск, ст-н “Трактар”, 1000 гледачоў, суддзя – А. Чарапнёў (Бабруйск), “Дынама” (Мінск) – “Тарпеда-БелАЗ” – 1:2. Галы: 37 хв, Сучкоў 0:1; 48 хв, Паліцэвіч – 1:1; 88 хв, Глеб – 1:2.

“Тарпеда-БелАЗ”: Часноўскі (25 хв, Сцяпанаў), Чалядзінскі, Чараднічэнка, Сучкоў (66 хв, Глеб), Селява, Лявіцкі, Шчагрыковіч, Яцкевіч, Казлоў (85 хв, Алеіна), Мельнік.

Чым бліжэй фініш першага этапа чэмпіяната, тым больш напружаная сітуацыя ў табліцы, а значыць, удвая, а можа нават утрая, узрастае кошт кожнага ачка. Таму і значэнне перамогі над сталічнымі дынамаўцамі значна павялічваецца – больш верагоднай выглядае магчымасць трапіць у першую шасцёрку.

Адкрыты трансферны перыяд дазволіў нашым землякам дазаявіць адразу чатырох новых футбалістаў: Казанцава, Алеіна, Міняна і ўкраінца Мельніка. Калі аб першых трох мы ўжо паведамлялі раней, то пра апошняга патрэбна расказаць падрабязней: менавіта гэты тарпедаўскі навабранец выйшаў на поле з першых хвілін.Сяргей Мельнік выконвае функцыі цэнтральнага абаронцы і з’яўляецца выхаванцам адэскага “Чарнаморца”, а апошні сезон выступаў за “Сумы”.

Пачатак матча з дынамаўцамі прайшоў з перавагай гаспадароў. Гэта зразумела, бо мінчанам, якія атрымалі паражэнне ў гульні Лігі Еўропы супраць харвацкага “Лакаматыва”, патрэбна было ўзняць настрой перад паядынкам у адказ. Жодзінцы здолелі вытрымаць стартавы націск і пачалі прад’яўляць саперніку свае аргументы. Адразу кідалася ў вочы, што нашы землякі былi настроеныя вельмі рашуча, дзейнічалi самааддана, натхнёна. Праўда, на жаль, у сярэдзіне першай паловы траўму атрымаў Павел Часноўскі, і ў гульню ўступіў Раман Сцяпанаў. Незадоўга да перапынку ў цэлым роўную гульню “ўзарваў” гол Сучкова. Лявіцкі рашыўся на далёкі ўдар, Гутар адбіў мяч, але першым на дабіванні быў наш паўабаронца і праз некалькі хвілін трапіў у кучу-малу сваіх аднаклубнікаў. Хочацца выказаць падзяку і жодзінскім фанатам, якія і па колькасьці, і па якасці падтрымкі перасягнулі сваіх апанентаў.

Другі тайм пачаўся з памылкі нашага галкіпера, які прапусціў мяч метраў з трыццаці пяці. Гаспадары на гэтым не спыніліся і працягвалі націск. Толькі вось аўтазаводцы таксама не думалі ні аб чым іншым, як аб перамозе. Асноўныя сілы былі сканцэтраваны на абароне ўласных варот, але жодзінцы раз-пораз «агрызаліся» вострымі контрвыпадамі. Магчымасць схіліць вагі перамогі на свой бок мелі абодва саперніка, толькі свой самы рэальны шанец выйсці наперад дынамаўцы, дзякуючы бліскучаму скачку Сцяпанава, не выкарысталі. А тарпедаўцы на апошніх хвілінах вырвалі перамогу. Шчагрыковіч прабіў з лініі штрафной пляцоўкі, Гутар адбіў мяч, і Глеб, які выйшаў на замену, пераправіў мяч у сетку.

Перамога над дынамаўцамі дазволіла нашым землякам паправіць сваё турнірнае становішча, а табліца чэмпіяната выглядае наступным чынам.:

Дублёры “Тарпеда-БелАЗ” свой матч прайгралi 0:2.

А ў гэтую нядзелю, 28 ліпеня, у матчы 1/16 Кубка Беларусi на сваім полі аўтазаводцы будуць прымаць прадстаўніка другой лігі – мінскую “Зорку-БДУ”. Пачатак а 17 гадзіне. Уваход свабодны. Так што да сустрэчы на футболе.

Сяргей Пузанкевіч