Першы крок да Кубка

1/16 Кубка Беларусі, Жодзіна, ст-н “Тарпеда”, 2350 гледачоў. Суддзя А. Мурашкевіч (Наваполацк), “Тарпеда-БелАЗ” (Жодзіна) – “Зорка-БДУ” (Мінск) – 3:0. Галы: 16 хв, Шчагрыковіч – 1:0; 62 хв, Яцкевіч – 2:0; 71 хв, Міняна – 3:0. “Тарпеда-БЕлАЗ”: Сцяпанаў, Чалядзінскі, (79 хв, Пракопчык), Міняна, Панкавец, Сучкоў (70 хв, Ерхан), Селява, Глеб (46 хв, Яцкевіч), Шчагрыковіч (74 хв, Мараў), Казлоў (70 хв, Васькоў), Алсіна, Казанцаў.

Згодна рэгламенту на стадыі 1/16 Кубка Беларусі каманды ніжэйшых дывізіёнаў павінны прымаць на сваім полі клубы вышэйшай лігі, але ў нашым выпадку, згодна дамоўленасці паміж сапернікамі, матч адбыўся ў Жодзіне. Маладыя мінчане атрымалі магчымасць, як сказаў іх галоўны трэнер Анатоль Шкляр, трапіць у сапраўдную футбольную атмасферу і згуляць на цудоўным полі.

Ігар Крыўшэнка даў магчымасць адпачыць некаторым футбалістам і адначасова праверыў у справе ўсіх навічкоў. З першых хвілін выйшлі Алсіна і Міняна, і трэба адзначыць: адразу спадабаліся жодзінскім заўзятарам, якія шмат разоў узнагароджвалі іспанскіх легіянераў апладысментамі. Ініцыятыва, як і чакалася, адразу перайшла да гаспадароў і заставалася ў іх да фінальнага свістка. Хвалі атак аўтазаводцаў адна за адной накатваліся на вароты “Зоркі-БДУ”. Шаснаццатая хвіліна стала галявой: Шчагрыковіч згуляў у сценку з Алсіна і “распячатаў рамку” гасцей. Да перапынку гледачы галоў больш не ўбачылі, бо атакі тарпедаўцаў адбываліся час ад часу і былі вельмі акадэмічнымі. Выпаў з гульні Глеб, які ў перапынку быў заменены на Яцкевіча.

Другі тайм аказаўся больш багатым на падзеі. Маладыя мінчане, па прычыне стомленасці, сталі дапускаць больш памылак, а вось гаспадары хуткасці не збавілі, і іх камбінацыі не аднойчы ставілі ў тупік сапернікаў. Да другога голу прывёў вуглавы ў выкананні Казлова. Барацьбу на другім паверсе выйграў Яцкевіч і галавой пераправіў мяч у вароты. Неўзабаве лік стаў буйным. Трэці гол аказаўся цалкам іспанскім. З-за межаў штрафной пляцоўкі зарадзіў Алсіна, галкіпер здолеў адбіць мяч, але першым на дабіванні аказаўся Міняна, і праз некалькі секунд ужо атрымліваў віншаванні партнёраў. Госці, трэба адзначыць, працягвалі супраціўленне і нават некалькі разоў даволі сур’ёзна патурбавалі Сцяпанава. Наш галкіпер ліквідаваў пагрозы і атрымаў сваю порцыю апладысментаў.

У панядзелак адбылася жэраб’ёўка наступнай стадыі Кубка. Сапернікам аўтазаводцаў па 1/18 фінала стаў «Шахцёр» Салiгорск. Матч адбудзецца ў Жодзiне.

А  наступную гульню ў чэмпіянаце “Тарпеда-БелАЗ” правядзе у суботу, 3 жніўня, на сваім полі, калі будзе прымаць мазырскую “Славію”. Пачатак а 18 гадзіне. Так што да сустрэчы на футболе.

Сяргей Пузанкевіч