У Астраўцы, Ашмянах і Валожыне не хапае медсясцёр (ІНФАГРАФІКА)

Выява выкарыстана ў якасці ілюстрацыі. Фота з сайта rusdental.ru

Ад 1 жніўня ў бальніцах Астраўца, Ашмянаў, Валожына, Вілейкі, Маладзечна, Мядзеля і Смаргоні з’явіліся 72 маладыя дактары, 140 спецыялістаў з сярэдняй медыцынскай адукацыяй, 39 інтэрнаў.

Аб гэтым паведамляе “Рэгіянальная газета”.

Астравец. На Астравеччыну прыйшлі 15 медыкаў. Два спецыялісты з сярэдняй спецыяльнай адукацыяй не выйшлі на працу. Адзін з іх паступіў у Гродзенскі медыцынскі ўніверсітэт, другі – у Віцебскую ветэрынарную акадэмію.

Загадчыца кадравага сектара Антаніна Гражуль адзначыла, што ў раёне па-ранейшаму не хапае медсясцёр.

Ашмяны. У Ашмянскім раёне пабольшала на 25 медыцынскіх работнікаў. Чатыры спецыялісты з сярэдняй спецыяльнай адукацыяй працуюць у раёне: фельчар-лабарант у Гальшанскай лабараторыі, акушэркі ў Муравана-Ашмянскай лабараторыі і ў Кальчунскім акушэрскім пункце. У Навасёлкаўскай амбулаторыі з’явіўся памочнік доктара па амбулаторна-паліклінічнай дапамозе.

Старшы інспектар па кадрах Уладзіслава Пяткевіч заўважае, што ў бальніцах не хапае фельчараў на фельчарскія пункты і медсясцёр.

Валожын. 30 медыкаў прыйшлі ў Валожынскі раён. Але ўсё роўна не хапае медсясцёр, дактароў вузкай спецыялізацыі: неўролага, псіхіятра-нарколага, фізіятэрапеўта, доктара лабараторнай дыягностыкі, рэабілітолага.
Пра гэта паведаміла начальнік аддзела кадраў цэнтральнай раённай бальніцы Тамара Круглік.

Вілейка. У Вілейцы не хапае ўчастковых тэрапеўтаў, адзначыла начальнік аддзела кадраў Алена Філістовіч. Усяго прыйшлі 34 медыкі.

Інфаграфіка, на якой пазначана колькасць маладых спецыялістаў у кожным раёне, а таксама іх спецыяльнасці

Маладзечна. На Маладзечаншчыне працуюць 87 новых медыкаў. Два з іх, тэрапеўт і стаматолаг, – у Красненскай ўрачэбнай амбулаторыі, тэрапеўт – у Радашкавіцкай бальніцы, астатнія – у Маладзечне.

Як адзначыла начальнік аддзела кадраў Алена Тумаш, не хапае дактароў вузкай спецыялізацыі – кардыёлагаў, неўролагаў, уролагаў, траўматолагаў, участковых тэрапеўтаў.

Мядзел. 34 маладыя медыкі з’явіліся ў Мядзельскім раёне. Тры з іх працуюць у раёне: тэрапеўт – у Свірскай участковай бальніцы, педыятр – у Нарачанскай бальніцы, доктар агульнай практыкі – у Крывіцкай бальніцы. Астатнія спецыялісты засталіся ў Мядзеле.

Як адзначыла начальнік аддзела кадраў Тамара Лаўнікоўская:
– У бальніцы не хапае псіхіятра-нарколага для наркалагічнага кабінета, фізіятэрапеўта, рэабілітолага. Няма загадчыка Слабадской амбулаторыі.

Смаргонь. У Смаргоні 27 маладых медыкаў. Паводле слоў начальніка аддзела кадраў Ліліі Булавай, не хапае эндакрынолагаў, тэрапеўтаў, стаматолагаў, кардыёлагаў.

Партал Край.бай пісаў раней аб тым, што два новыя ўрачы, дзесяць медсясцёр і адзін урач-інтэрн прыехалі ў Пастаўскі раён.

Паводле “Рэгіянальнай газеты”