У Ільянскай СШ імя А. Грымаця на Вілейшчыне завяршыўся праект “Краязнавец года” (ФОТА)

Свята, прысвечанае падвядзенню вынікаў краязнаўчага месячніка, а калі гаварыць насамрэч, то ўсяго навучальнага года (бо яно падводзіла вынік конкурса “Лепшы краязнавец года”), прайшло 10 красавіка.

Безумоўна, месячнік па краязнаўству быў плённым і выніковым. Кожны клас удзельнічаў у акцыі “Звіняць медалі на грудзях ветэранаў”, якая прысвячалася 70-годдзю вызвалення Беларусі ад нямецка-фашысцкіх захопнікаў. Творчыя даследчыя працы гэтай акцыі размешчаны ў інфармацыйным краязнаўча-метадычным цэнтры школы.

Музей “Ільянскія далягляды” папоўніўся звесткамі пра ўзнагароды ўдзельнікаў Вялікай Айчыннай вайны, якія сабралі вучні пра сваіх прадзедаў, родных, суседзяў, аднавяскоўцаў.

Сустрэча з ветэранам вайны Чаславам Антонавічам Варславанам ускалыхнула юных слухачоў да глыбіні душы. Шаноўнаму ветэрану даўно пераваліла за 90 гадоў. Але ён проста і шчыра распавядаў пра мінулыя выпрабаванні і страты, перамогі і раненні: “Нас, ветэранаў, засталіся адзінкі, мяне таксама не стане... Я гавару пра тое, што бачыў, перажыў. Так хочацца, каб вы памяталі пра вайну і бераглі мір”. Каб не пайшлі ў небыццё ўспаміны Часлава Антонавіча, мы зрабілі відыёзапіс і фотаздымкі сустрэчы.

Акрамя таго, 10 красавіка прайшлі веснавыя дэсанты па добраўпарадкаванні мемарыяльных комплексаў Боркі, Любча (спаленых у час вайны вёсак), помніка на месцы знішчэння яўрэяў у Ільі, магіл ахвярам фашызму (в. Капусціна, Каўшэвічы). На мемарыяльным комплексе Любча пасаджана “Алея памяці”.

У школе прайшоў шэраг мерапрыемстваў, прысвечаных 70-годдзю вызвалення Беларусі ад нямецка-фашысцкіх захопнікаў, 70-годдзю перамогі савецкага народа ў Вялікай Айчыннай вайне. І ўшанаванне гэтых дат працягваецца.

У музеі “Вілейшчына літаратурная” прайшлі мерапрыемствы, прысвечаныя 100-годдзю члена Саюза пісьменнікаў Беларусі Ганны Новік, такому ж юбілею Аркадзя Куляшова, 200-годдзю лінгвіста Іосіфа Гашкевіча, 60-годдзю Уладзіміра Цануніна, якога нядаўна прынялі ў Саюз пісьменнікаў Беларусі. На экскурсіі прыходзяць вучні цэлымі класамі.

У конкурсе “Лепшы краязнавец года” удзел прынялі ўсе вучні школы праз вусныя і пісьмовыя адказы на пытанні, заданні, выступленні, літаратурную творчасць, сабраныя экспанаты. Краязнаўчы і літаратурны музеі, інфармацыйна-краязнаўчы цэнтр лічылі балы, ацэньвалі творчыя працы, рыхтавалі сцэнарый. Вынік атрымаўся выдатны: больш за 40 чалавек атрымалі дыпломы і падзякі, а свае творчыя працы чыталі толькі тыя, хто перамаглі.

Яўгенія Краўчонак, Кірыл Яцэвіч і Кацярына Чарапок

Уладзіслаў Кірпік і Роза Шэрая

Эльвіра Кіндзібулатава і Кацярына Чарапок

Ліза Барташэвіч і Роза Шэрая

Зараз кожны з аўтараў можа зазірнуць у чарговы “Куфэрачак”. Выпускаць такі зборнічак стала традыцыяй пры падвядзенні вынікаў конкурса “Лепшы краязнавец года”.

Па матэрыялах, прадастаўленных Край.бай кіраўніком народнага літаратурнага музея “Вілейшчына літаратурная” Ільянскай СШ імя А. Грымаця Розай ШЭРАЙ
Фота Васіля ШЭРАГА