На Смаргоншчыне прайшоў фэст “Залессе запрашае сяброў”

Сёлетняе свята зноў сабрала шмат гасцей – самі залессцы і іх госці, народныя майстры са Смаргоншчыны і наваколля, артысты са сталіцы.
Перш чым патрапіць на фестываль, мясцовыя артысты на святочна ўбраных брычках праехалі па вуліцах аграгарадка, запрашаючы вяскоўцаў на свята. На конных вазках яны і прыехалі да святочнай фестывальнай сцэны. А потым весялілі прысутных задорнымі песнямі-прыпеўкамі. У канцэрце удзельнічалі і госці – народны вакальныансамбль “Белы птах” з Мінска.
На пляцоўцы перад сядзібай Міхала Клеафаса Агінскага развярнуўся кірмаш – тут частавалі прысмакамі мясцовай  кухні, а майстры прапаноўвалі свае вырабы – драўляныя, саламяныя, словам “усякіх дзівосаў было багата”.
У гэтым годзе ўпершыню бралі ўдзел прадстаўнікі аграсядзіб Смаргоншчыны, якія прэзентавалі гасцям свае паслугі і частавалі іх традыцыйнымі беларускімі стравамі.
Адметнай асаблівасцю сёлетняга свята можна назваць і “зялёны” плэнер “Па мясцінах натхнення”, які прайшоў напярэдадні фэста. Два дні мастакі з Беларусі і Літвы стваралі творы з відамі парка і адрэстаўраванай сядзібы ў Залессі. На фестывалі яны падарылі свае работы музею-сядзібе М.-К. Агінскага.
На гульнёвай пляцоўцы шмат забавак было для дзяцей, але найперш іх прыцягвала магчымасць пакатацца на бронетранспарцёры, якую прадставілі аматары грамадскай суполкі “Смаргонь франтавая”. Госці фестывалю мелі магчымасць пазнаёміцца з артэфактамі Першай сусветнай вайны, знойдзенымі на Смаргоншчыне падчас раскопак.
Старэйшыя залессцы з задавальненнем сталі сведкамі цікавай імпрэзы – на сцэне сустрэліся сябры-аднакласнікі, якія скончылі залесскую школу 50 гадоў таму. Прадстаўніцтва атрымалася даволі шматлікае – прыехалі 20 з 30 былых выпускнікоў. Многія не бачыліся дзесяцігоддзі, а таму моманты сустрэчы сталі сапраўдным святам.
Кірмашовы настрой у той дзень панаваў у Залессі  да вечара.