У Слонімскім раёне здымалі фільм на беларускай мове

У чацвер, 14 сакавіка, у вёсках Мілаванне і Шышкі вяскоўцы здымалі фільм пра родны край. Гэтую невялікую імправізацыю арганізавала мясцовая жыхарка Галіна Захарчук, якая сама напісала сцэнар і адабрала акцёраў. 

[View the story "У Слонімскім раёне здымалі фільма на беларускай мове" on Storify]

—Шмат гадоў я марыла пра тое, каб зняць фільм пра родную вёску. Асабліва  пачала думаць пра гэта, калі закрылі наш клуб. У нас няма ні крамы, ні паштовага аддзялення. Гэты фільм будзе як памяць пра вёску, якой хутка можа не стаць. Вось так і нарадзіўся фільм. Галоўная гераіня фільма жыве ў вёсцы Мілаванне. Яна закахалася. Гэта будзе прыгожая гісторыя кахання і адносін паміж людзьмі. Бо назва гэтай вёскі з польскай мовы перакладаецца як каханне, — распавяла Галіна Уладзіміраўна.

Галоўнай асаблівасцю фільма з'яўляецца тое, што ён будзе на беларускай мове. Фільм заснаваны на рэальных падзеях, якія адбываліся ў Мілаванні. Галоўнай гераіняй будзе дзяўчына, якая жыве ў вёсцы і ў якой нараджаецца каханне да хлопца. Акрамя гэтага, карціна будзе распавядаць пра жыхароў навакольных вёсак, пра народныя традыцыі, пра смешныя гісторыі, у якія траплялі вяскоўцы.

У гэты дзень здымалі сцэну пра чалавека на трактары. Мужчына ехаў па дарозе на сваёй тэхніцы ў шапцы з падвязанымі вушамі і з-за гэтага нічога не чуў. За трактарам ужо сабралася некалькі аўтамабіляў, якія не маглі яго абагнаць. Калі трактарыста абмінулі, кіроўца легкавога аўтамабіля залез у кабіну трактара, дастаў адтуль трактарыста і спытаў у таго:

 —Чаму ты не саступаў дарогу? Я табе сігналіў.

—Я не чуў.

Раззлаваны шафёр зняў шапку з трактарыста і адрэзаў у ёй вушы.

Адна са сцэн фільма такая.

Моладзь вырашыла пажартаваць з закаханай парачкі. Дзяўчаты залезлі на дрэва і сталі пільнаваць дзяўчыну з хлопцам. У гэты момант ідзе п'яны брыгадзір. Самая старэйшая з дзяўчат, якія сядзяць на дрэве, пачала рохкаць. Брыгадзір не разумее, што здарылася. Ён ходзіць вакол дрэва, глядзіць і нічога не бачыць. А як толькі брыгадзір сабраўся сыходзіць, дасціпная дзяўчына зноў рохкае. Брыгадзір злуецца і кажа, што ён усё праверыць і з усімі разбярэцца.

У здымках фільма бралі ўдзел 10 чалавек. На гэты раз знялі толькі частку сцэн. Далейшыя здымкі працягнуцца толькі вясной, калі заквітнее сад.