Выйшаў рэгіянальны літаратурны альманах “Новы замак”

Першы выпуск літаратурнага альманаха Гродзенскага абласнога аддзялення ГА “Саюз беларускіх пісьменнікаў” “Новы замак” днямі выйшаў у свет у сталічным выдавецтве “Кнігазбор”. Слонім у ім прадстаўляюць Мікола Канановіч, Янка Саламевіч і Сяргей Чыгрын.

Альманах уключае ў сябе творы 21 аўтара, якія жывуць (альбо жылі) на Гродзеншчыне. Кампазіцыйна кніга падзелена на пяць частак — паэзія, проза, пераклады, крытыка (тут жа — край, дзённікі) і хроніка. Сяргей Астравец, Данута Бічэль, Анатоль Брусевіч, Юрка Голуб, Міхась Губернатараў, Валянцін Дубатоўка, Ала Петрушкевіч, Юры Гумянюк, Аляксей Пяткевіч і іншыя творцы сабраліся пад адной вокладкай.       

Тэхнічную падрыхтоўку выдання, яго ўкладанне і раздзел “Хроніка” зрабіў пісьменнік і журналіст з Гродна Сяргей Астравец. Прадмовай Сяргея Астраўца “Сфінксы новага замка” і пачынаецца альманах.

Рэдактарам выдання з’яўляецца паэт Юрка Голуб, што досыць сімвалічна. У свой час менавіта Юрка Голуб у бібліятэчцы “Гродзенскай праўды” рыхтаваў штогод літаратурныя альманахі пісьменнікаў Гродзеншчыны “Галасы”. Справа тая рабілася, пачынаючы з 2002 года, пакуль рэдактарам абласной газеты працаваў Іосіф Багіна. Апошні — чацвёрты — выпуск “Галасоў” пад эгідай дзяржаўнай газеты пабачыў свет у 2005 годзе. Потым на пасаду рэдактара “Гродзенскай праўды” была прызначана нехта Бераснева, якая згарнула гэты творчы праект. З таго часу літаратары Гродзеншчыны не мелі такога выдання. І вось паўстаў альманах “Новы замак”, да якога дзяржава ўжо не мае ніякага дачынення.

Прэзентацыя літаратурнага альманаха “Новы замак” павінна адбыцца ў Гродне ў сераду, 27 лютага. Тыраж выдання — 200 асобнікаў.